Grupi parlamentar socialist vendosi të hënën që të votojë kundër kërkesës së Prokurorisë së Posaçme, SPAK, për arrestimin e ish zv.kryeministres Belinda Balluku, e cila akuzohet për veprën penale të shkeljes së barazisë në tendera me vlerë qindramilionë euro në mënyrë të përsëritur.
Mazhoranca socialiste deklaroi të hënën qëndrimin e saj kundër kërkesës së Prokurorisë së Posaçme, SPAK, për arrestimin e ish zv.kryeministres Belinda Balluku, duke i ofruar mbrojtje politike nga drejtësia.
“Nuk ka vend për dhënien e autorizimit për masën e sigurimit personal arrest me burg/arrest shtëpie”- tha Ulsi Manja, anëtari i Këshilit të Mandateve i cili lexoi raportin e socialistëve për kërkesën e SPAK.
Në një argumentim të gjatë Manja ‘rrëzoi’ si të pabazuara argumentet e SPAK për nevojën e masës së arrestit dhe pretendoi se argumentet për rrezikim të provave nuk qendronin pasi ajo nuk i ushtron më detyrat ekzekutive në qeveri.
“Rreziku i prishjes së provave nuk u provua me fakte reale, por janë konsiderata që në themel të tyre kanë ish-funksionin e ministrit që mbante Balluku, aq më tepër që akuza mbetet e njëjta”, tha Manja.
Lidhur me provat e paraqitura nga prokurorët e SPAK në Këshillin e Mandateve për presionet ndaj dëshmitarëve nga personave të fortë dhe nga zyrtarë të kabinetit të Ballukut, Manja po ashtu aludoi se prokurorët nuk kishin bërë hetime mjaftueshëm për ta provuar këtë ‘pretendim’.
Sipas raportit të PS masa e ndalimit të lëvizjes jashtë shtetit është e mjaftueshme që hetimet ndaj Ballukut të vijojnë.
Kjo është hera e dytë që mazhoranca i ofron mbrojtje politike dhe refuzon heqjen e imunitetit parlamentar për një të akuzuar nga drejtësia në radhët e tyre, pas mbrojtjes që ofruan për ish-ministrin e brendshëm Sajmir Tahiri, i dënuar më pas nga gjykata për ‘shpërdorim detyre’ për kontaktet me elementë të krimit të organizuar.
Kryeministri Edi Rama i pranishëm në mbledhjen e grupit forcoi qëndrimin e tij në mbrojtje të Ballukut duke i cilësuar hetimet ndaj saj si ‘gjyq publik’ dhe sulmoi Prokurorinë e Posaçme.
“Thjesht njoftimi i akuzës në rrugën e shtrembër, dhe fatkeqësisht i bërë zakon nga grupet hetimore të ‘stacionit të trenit’, që përdorin mediat si forca paramilitare të fajësimit dhe asgjësimit të subjekteve të tyre, mjaftoi që ndaj Belinda Ballukut të ngriheshin dallgët e urrejtjes dhe të zienin 700 tenxhere’- tha Rama.
Votimi për imunitetin e Ballukut pritet të mbahet në seancën e së enjtes, në limitet kohore të një vendimmarrje ligjore nga Kuvendi, pasi mazhoranca e zvarriti procesin për 3 muaj me radhë.
Nga ana tjetër anëtarët e opozitës në Këshillin për Rregulloren, Mandatet dhe Imunitetin në raportin e tyre rekomandojnë votën pro kërkesës së Prokurorisë së Posaçme bazuar në provat e sjella nga SPAK në Kuvend, jurispudencën kushtetuese, opinionet e Komisionit të Venecias si dhe frymën e luftës antikorrupsion.
