Rreth 130 mijë të punësuar në administratën publike do të marrin para më tepër në rrogat e tyre.
“Efekti i rritjes së pagave hyn në fuqi nga i prilli (muaji i shkuar). Faza tjetër do të jetë vitin e ardhshëm për të arritur më pas objektivin 900 euro,” u shpreh Delina Ibrahimaj, ministre e Financave dhe Ekonomisë.
Rritja e pagave bëri bashkë socialistët e demokratët, me përjashtim të deputetit të grupit të “Rithemelimit”, Edmond Spaho.
“Ju keni propozuar këtë që keni propozuar por keni shkelur ligjin. Deputetët nuk mund të përjashtoheshin nga rritja e pagave,” deklaroi ai.
Megjithëse votoi “pro”, deputeti demokrat Arbi Agalliu shprehu rezerva mbi rritjen e pagave jo sipas niveleve të hierarkisë.
“Nuk ka asnjë sens logjik që një specialist të ketë pagë më të lartë se ministri. Kjo zhbën çdo ligj ekonomik dhe jo vetëm.”
Për socialistin Erion Braçe rritja e pagave duhet të shoqërohet me kontrolle mbi çmimet, pasi në të kundërt ato do të gërryhen nga ata që spekulojnë.
“Këto para do të mbarojnë shpejt. Me gjithë rënien e çmimeve të konsumit jashtë, shohim që në tregjet tona çmimet janë shumë të larta. Sado ne të rrisim pagat, ato nuk do të mjaftojnë nëse nuk do kemi çmime të ndershme.”
Pas miratimit në Komisionin për Ekonominë dhe Financat, projektligji për rritjen e pagave në administratën publike do të kalon për miratim në Parlament. Nisma e qeverisë pritet të gjejë edhe dakordësinë e opozitës, përfaqësues të së cilës kanë ftuar disa herë përshpejtimin e procedurës për miratimin e saj.
