Inovacioni, teknologjia dhe programet e kodimit janë fushat ku qeveria po tregon interes në financime dhe mbështetje të të rinjve në këtë fushë.
“Programi i Kodimit”, i njohur ndryshe edhe si Programi i Formimit Profesional, që po zbatohet për herë të parë në vendin tonë, do t’i shërbejë vizionit afatgjatë që Shqipëria të arrijë potencialin e plotë të dixhitalizimit.
Aktualisht 2600 të rinj kanë zgjedhur të specializohen në fushën e programimit “Python Fullstack”. Lajmi është bërë i ditur nga kryeministri Edi Rama, i cili ka publikuar në facebook-un e tij edhe njërin prej të rinjve që ka zgjedhur të ndjekë kursin me mbështetje financiare të plotë nga qeveria.
“Mirëmëngjes, dhe me Xhonin një ndër 2599 të rinjtë që ka zgjedhur të profesionalizohet në fushën e programimit “Python Fullstack”, pranë akademisë Betaplan, me 100% mbështetje financiare nga qeveria për programin e kodimit, ju uroj një ditë të mbarë”, shkruan Rama në Facebook.
Ky program është i financuar 100 % nga shteti dhe do të shërbejë në përgatiten e të rinjve të grup-moshës 16-35 vjeç të kalojnë në një karrierë në industrinë teknologjike, duke pasur parasysh dhe tendencat e tregut për këto profesione.
p.k\dita
