Gjykatësi i Apelit Engert Pëllumbi do gjykojë këtë të martë masën e sigurisë për kryebashkiakun Veliaj. Një prej atyre që e njohin karrierën e këtij gjyqtari është juristi Kreshnik Spahiu. Më poshtë, një prononcim i tij lidhur me këtë gjykatës:
“Engert Pëllumbi nuk është socialist, se ai ka dënuar me burg Saimir Tahirin, madje në periudhën kur ish-ministri i PS ishte një nga figurat më të forta dhe personaliteti i parë politik që shkonte në burg dhe të dënohej nga një gjykatë.
Për ata që kanë dyshime për Pëllumbin, do i thoja që këtij djaloshi që e kam njohur duhet t’i besohet më shumë.
Engert Pëllumbi është një nga gjyqtarët më të ndershëm, me integritet dhe me karakter, të magjistraturës shqiptare, një gjyqtar që me modestinë e tij ka bërë një karrierë të sigurt. Ai ka nesër në dorë pjesërisht çështjen e fatit të dosjes Veliaj.
Fati i Veliajt nuk është në dorën e SPAK. SPAK është një organ i suksesshëm që duhet vlerësuar për punën që ka, në të drejtën e tyre të kërkojnë çfarëdo lloj mase shtrënguese. Por, është në detyrën e gjykatës të bëjë arbitrin mes prokurorisë dhe mbrojtjes ligjore.
A është aq i rrezikshëm Veliaj sa të shantazhojë dëshmitarët, të shkatërrojë provat? Veliaj në arrest shtëpiak me një polic në derë, a e pengon hetimin apo jo?
Veliaj nuk është arrestuar në flagrancë, sipas prokurorit Olsi Dado janë vepra penale që janë kryer në të shkuarën; prova që janë siguruar nëpërmjet sistemit bankar dhe elektronik. Si mund t’i prishë këto transaksione bankare?
Gjykimi për Veliaj do bëhet kur dosja të kalojë për gjykim, ky është proces që do marrë të paktën 2 vjet. Nuk jemi këtu për të gjykuar se çfarë do bëhet për dosjen e 2027, por çfarë do bëhet për masën e sigurimit”.
