Njihet Sazani dhe ishujt e Ksamilit po a ka Shqipëria ishuj të tjerë?
Ishulli Kune është ishull ranor i ulët në bregdetin e Lezhës, në të djathtë të deltës së Drinit të Lezhës, 1.5 km larg bregut.
Shtrihet me drejtim lindje-perëndim dhe ka sipërfaqe 125 ha. Është krijuar nga prurjet e ngurta të Drinit dhe kjo bën që forma dhe madhësia e tij të ndryshojnë vazhdimisht.
Në një rrip të ngushtë ranor në anën lindore kalon rruga që lidh ishullin me Lezhën.
Në anën jugore e lindore laget nga laguna e Merxhanit. Më shumë se gjysma e ishullit zihet nga një kënetë e cekët.
Ishulli Kune dallohet për pasurinë dhe shumëllojshmërinë e faunës (sidomos të shpendëve ujorë) dhe prandaj është shpallur rezervat kombëtar dhe monument natyre.
Sot aty ka restorante dhe mjedise turistike por ndoshta jo të gjithë e dinë që kjo sipërfaqe e vogël toke e rrethuar nga uji ka një histori shumë interesante.
Ajo përmendet që prej shekullit të XV, pasi ishte streha e banorëve të Lezhës ndërsa qyteti u pushtua nga osmanët në 1478.
Ishte edhe një formë porti në këtë fshat, pasi pikërisht këtu zbriti me trupat e tij Skënderbeu i Ri, nipi i Gjergj Kastrioti, me 5 mars 1501.
Për 23 vite me radhë, ky ishull ishte i vetmi vend në bregdetin e Shqipërisë së veriut që ishte i lirë dhe i vetëadministruar gjatë ripushtimit osman pas Skënderbeut.
n.s. / dita
