Kreu i Partisë së Lirisë Ilir Meta ka ironizuar raportimet se bashkëshortja e tij, njëkohësisht deputete, Monika Kryemadhi, ka marrë para nga rusët. Në një intervistë televizive, Meta tha se ky është ‘shpërblimi’ që ka marrë Kryemadhi pasi ‘gërmoi’ dosjen e inceneratorëve. Ai tha se të gjitha dokumentet janë të falsifikuara dhe se po publikohen vetëm për të sulmuar Kryemadhin, pas denoncimeve që bën kjo e fundit. Kreu i PL-së i konsideroi një ‘marrëzi’ të Endri Fugës, drejtorit të Komunimit të Kryeministrit Edi Rama.
“Çfarë të sqaroj, Monikës mirë ia bëjnë sepse iu qep aferës së inceneratorëve. Ju thirreni Monikën këtu sepse ajo është mësuar me shpifjet në politikë. Kam problem se ma kërkojnë kudo që shkoj sidomos gratë dhe vajzat e reja. Një arsye që e duan kaq shumë është për shkak edhe të kritikave të mia. Le ta kallëzojnë në SPAK, ju e patë raportin që inceneratorët paguajnë mediat për të nxjerrë të tilla shkrime. Ata paguajnë edhe këtu gazetarë e analistë për të shpifur. Monika këtu është dhe këtu do jetë.
Nuk ka lidhje Monika me asnjë moment. Marrëzitë e Endri Fugës do merrem unë këtu, janë të falsifikuara, çfarë lidhje ka Monika me ato punë? Nuk e di a ka kohë Monika të merret me këto gjëra, nëse e ka depozituar në SPAK. Vepër kriminale e financuar nga Tirana sepse po atë ditë u hap Financial Times me Ramën. Një vend që është kthyer në një bazë logjistike për krimin e organizuar ndërkombëtar, për drogën që vjen në Europë nga Amerikan Latine, po shihni ç’ndodh në Amerikën Latine e Ekuador e Peru, që ndodh për shkak të një qeverie të inkriminuar që nuk ka zgjedhur rrugën e zhvillimit të vendit dhe mbështetjes së bujqësisë e start up-eve, por rrugën e pastrimit të Parave që Shqipëria të jetë ferr për shqiptarët e parajsë për pastrimin e parave.
Penetrimi i rusëve më i fortë se asnjëherë sepse Rama ka braktisur drejtimin evropian e perëndimor të vendit ndaj zvarrit integrimin dhe bën portin e Durrësit, sepse ka zgjedhur modelin autokratik që e ka zhvendosur në Lindje e në rrugën e krimit,”- tha Meta.
