Këshilli Drejtues i Radio-Televizionit Shqiptar zgjodhi me 9 vota PRO të 9 anëtarëve prezentë në mbledhjen plenare, Drejtorin e Përgjithshëm të RTSH-së Zotin Alfred Peza.
Kandidatura e Pezës ishte një ndër tre kandidatët që u paraqiten në dëgjesën publike që organizoi Këshilli Drejtues duke respektuar procedurën ligjore.
Në dëgjesën publike ishin parashikuar të dëgjoheshin 4 kandidatë që u kualifikuan në garë, por një prej tyre Helidon Haliti njoftoi Këshillin Drejtues se për arsye shëndetësore, tërhiqej nga gara.
Mbledhja plenare e Këshillit Drejtues nisi me dëgjesa e kandidatëve për Drejtor të Përgjithshëm, duke respektuar rendin alfabetik.
Kandidatët prezantuan pikat kryesore të platformave të tyre ku synohej sipas tyre të fuqizohej media publike RTSH, duke e sjellë atë më pranë shikuesve e duke i shërbyer interesit për informim publik.
Në përfundim të dëgjesave 9 anëtarët e Këshillit votuan në mënyre të fshehtë për zgjedhjen e drejtuesit të ri të Radio-Televizionit Publik Shqiptar.
Shpallja e rezultatit nxori fitues zotin Alfred Peza për postin e Drejtorit të Përgjithshëm që sipas ligjit e ushtron detyrën në 5 vitet që vijnë.
