Kryetari i komanduar i PD Enkelejd Alibeaj bën fajtor Berishën për faktin që partia e madhe opozitare merr pjesë në garën e 14 majit me vetëm 14 kandidatë për kryetarë bashkie.
Gjatë një interviste televizive, Alibeaj u shpreh se përçarja nisi që në 2013 atëherë kur Sali Berisha dha dorëheqjen, por e pranon se nuk u largua nga PD. Ai thotë që do duhet të kishin reaguar që atëherë.
“Berisha kur tha në 2013 do iki, do duhet realisht të ikte, sepse kështu bën një njeri burrë shteti. Reagimi do duhet të ishte më i fortë dhe intesiv”, tha Alibeaj.
Në ndryshim nga Sali Berisha, Alibeaj thotë se nuk do të bashkëpunonte kurrë me Ilir Metën.
“Me ilir Metën s’jam mik. Për ata Non Grata në konceptin, nga ata të cilët janë kundër marrëdhënieve të shqiptarëve me SHAB, që nuk e shohin korrupsionin si një ndër probemet kryesore, është nevojë ulëritëse e shoqërisë shqiptare, nga të gjithë ata bartës të këtyre simptomave, sa më përket mua, kurrë”, tha Alibeaj.
Fakti që në diskursin politik të Edi Ramës është vetëm Sali Berisha dhe Ilir Meta e jo opozita e vërtetë, për Alibeajn ka një arsye. Ai tha se Rama është i vetëdijshëm që përballë tyre e ka të sigurt fitoren.
“Ka kuptuar këtë gjë, biznesin e ka futur në xhep, median e ka future në xhep, tani po përcakton dhe opozitën. Edi që me Berishën dhe Metën e ka të fituar gjithmonë”, tha Alibeaj.
Ai sqaroi se në këtë fushatë nuk ka mbajtur një qëndrim me qëllim për të dëmtuar palën tjetër të PD-së, ndryshim nga Berisha, madje tregon se gati i janë përgjëruar për bashkim, ftesë kjo që i është refuzuar.
Megjithatë, kjo ftesë për bashkim, Alibeaj tha se nuk i është drejtuar kurrë “shtetasit Sali Berisha”.
