Anëtar i Këshillit Kombëtar të PD-së, Ilir Alimehmeti ka deklaruar gjatë një interviste televizive se tensioni i krijuar së fundmi me tubimet e opozitës është e vetmja mënyrë që sistemi të dëgjojë shqetësimin dhe zërin e popullit.
Ai shtoi më tej se çështja e ish-agjentit të FBI-së, Charles McGonigal është një temë që i takon drejtësisë amerikane. Alimehmeti shtoi se në krahun shqiptar duhet të ketë një reagim për përfshirjen e kryeministrit në këtë aferë, pasi sipas tij në këtë mënyrë njolloset figura e Shqipërisë.
Sipas Alimehmetit, në parlament është kthyer në hobi që të përjashtohen deputetët, madje edhe në raste kur nuk flasin fare duke iu referuar përjashtimit të Belind Këlliçit. Sa i përket çështjes së vulës së PD, ai deklaroi se pala që ka më shumë mbështetës duhet të jetë pala që merr vulën dhe logon e partisë.
“Tensioni është krijuar për të rikthyer shërbimet e merituara te qytetarët. Sistemi këtu nuk dëgjon atë që po i thuhet nga popullata. E vetmja metodë që ka populli është duke ngritur zërin përmes disa lloje protestash që nuk janë të dhunshme.
Protestat janë reagime, nuk janë zgjidhje, ajo vjen nga organet përkatëse. Sa i përket McGonigal atë e ka marrë Kongresi në Amerikë. Në krahun tonë ka një urtësi, po flitet për zyrën e Kryeministrit këtu, si ka mundësi që këtu ka heshtje dhe as nuk diskutohet ky element.
Të gjitha këto reflektohen në kurrizin tonë. Ne këtu marrim një njollë sepse aty flitet për Shqipërinë. Meqenëse kryeminsitri është në detyrë, ndryshe me raste kur kryeministrat janë dorëhequr deri sa kanë vazhduar hetimet dhe më pas janë rikthyer. Kaq po kërkohet”, u shpreh Alimehmeti.
m.b./dita
