Mazhoranca nuk është tërhequr nga dy nismat e saj për amnistinë fiskale dhe legalizimin e kanabisit.
Sekretari i Përgjithshëm i PS Damian Gjiknuri gjatë një interviste televizive, u shpreh se qeveria është duke diskutuar me institucionet ndërkombëtare financiare dhe mekanizma të tjerë të Bashkimit Europian për të gjetur një zgjidhje më të pranueshme.
“Mendoj që qeveria ka pritur, është duke diskutuar me institucionet ndërkombëtare financiare dhe mekanizma të tjerë të Bashkimit Europian për të gjetur një zgjidhje më të pranueshme dhe mendoj se kjo është qasja e duhur.
Të mos e paragjykojmë kanabisin ilegal me kultivimin e kanabisit mjekësor pasi mjafton të shkosh dhe në vende fqinje, qoftë në Greqi, qoftë në Maqedoni, që të kesh mundësi të shikosh se si funksionon ky proces.
Diku ka funksionuar më mirë, diku më keq, por ka eksperienca. Unë vetë përshembull jam bërë kureshtar dhe kam vajtur, kam patur mundësinë në vende të ndryshme ta shikoj si funksionon një zinxhir i tillë prodhimi dhe nëse është e rregulluar sipas standardeve, funksionon shumë mirë dhe nuk cenohet as rendi e siguria publike”, u shpreh Gjiknuri.
m.b./dita
