Ministrja e Financave dhe Ekonomisë, Delina Ibrahimaj deklaroi se qeveria është ende duke punuar me draftin e amnistisë fiskale.
Në një konferencë për mediat, Ibrahimaj u shpreh se është e rëndësishme që ky draft të konsultohet me partnerët ndërkombëtarë.
Kjo sipas saj, me qëllim që të mos bëhen veprime të nxituara, të cilat mund të shkaktojnë problematika për ekonominë e vendit.
“Përsa i përket amnistisë fiskale, unë e kam përsëritur në raste të ndryshme. Ne jemi duke punuar akoma me draftin e amnistisë. Është e rëndësishme që ai draft të vijë i mirëkonsultuar nga të gjithë partnerët tonë ndërkombëtarë, me qëllim që të mos bëjmë veprime të nxituara, të cilat mund të shkaktojnë problematika për ekonominë e vendit. Jemi ende duke u konsultuar dhe do të vijojmë konsultimin për sa kohë të jetë e nevojshme”, theksoi ajo.
Ndërsa ligji për bastet online do të kalojë për konsultim publik në fillim të javës së ardhshme.
“Sa i takon ligjit të basteve online, ligji parashikon rihapjen e basteve online sportive dhe jo të gjitha basteve siç kanë qenë më parë të hapura nëpër pikat fizike. Ligji do të hidhet për konsultim publik në fillim të javës së ardhshme dhe do të kalojë fazat e konsultimit publik. Më pas, do të shkojë në qeveri dhe do të ndjekë fazat e miratimit në parlament. Do të ketë tryeza konsultimi me të gjithë grupet e interesit, me qëllim që të arrijmë në një draft ligjor sa më të konsoliduar dhe mbi të gjitha të kujdesimi që drafti ligjor të parashikojë mbrojtjen sociale për ato kategori që mund të jenë të prekura nga ky ligj, që ishte në fakt arsyeja kryesore pse ne në të kaluarën, vendosëm që t’i pezullojmë të gjitha lojërat e fatit me pika fizike, siç ishin të shpërndara dikur në vend”, theksoi ministrja.
j.l./ dita
