Pasi kanë parë rezultate partitë e vogla vijojnë të dorëzojnë kërkesa për rinumërim të votave për këshillat bashkiakë në bashki të ndryshme pasi nuk u kanë dalë rezultatet e pritshme.
KQZ njoftoi sot se pesë parti kanë dorëzuar ankesat në Komisionin e Ankimeve dhe Sanksioneve duke kundërshtuar rezultatet e zgjedhjeve të 14 majit për këshilla bashkiakë.
Bëhet fjalë për ankesën e Frymës së Re Demokratike dhe LZHK që kundërshtojnë rezultatet në këshillin bashkiak në Memaliaj.
LZHK kërkon rinumërim edhe në Pukë ndërkohë Bindja Demokratike ka kundërshtuar rezultatin në Tropojë.
Partia Aleanca Demokristiane e Shqipërisë kërkon shpalljen e pavlefshme të rezultateve në këshillin bashkiak të Gjirokastrës, ku vetëm për një votë, Partia Republikane ka arritur të marrë një mandat.
Memaliaj
Fryma e re Demokratike kërkon rinumërimin e kutive të votimit për këshillin bashkiak në Memaliaj pasi thotë se janë vërejtur parregullsi në 15 kuti votimi. Ajo thotë se në këto kuti votimi është tjetërsuar vota e subjektit të tyre elektoral. Madje në ankesën e saj shkruan se një numërues u tërhoq kur pa parregullsitë. Një tjetër problematikë që konstaton është se numëruesit në grupet e numërimit kanë qenë në konflikt interesi me listat e kandidatëve për këshilla bashkiakë, si vëlla, motër, burrë, grua me kandidatët e parë dhe të tjerë në listat respektive.
Edhe LZHK kundërshton rezultatin e zgjedhjeve për këshillin bashkiak në Memaliaj dhe kërkon rinumërimin e kutive të votimit.
LZHK thotë se numërues ishte burri i kryetares së PS-së, dhe motra e saj.
Ankimimi për Pukën
Në KZAZ Pukë gjatë votimit për Këshillin Bashkiak, LZHK pretendon se vëzhguesit e tyre kanë konstatuar se në 7 kuti, në ekranin e numërimit të votave, kanë dalë më shumë vota për këtë subjekt sesa janë pasqyruar në procesverbal. Po ashtu, sipas tyre, në po këto kuti, i janë hequr vota Partisë Republikane dhe i janë shtuar partive të tjera. Në ankimim, LZHK pretendon edhe se në 6 kuti të tjera në Pukë, janë evidentuar më shumë vota të pavlefshme sesa janë pasqyruar në procesverbal, duke shtuar se këto vota i janë kaluar subjekteve të tjera. LZHK pretendon për një mandat në Këshillin Bashkiak Pukë, teksa thotë se diferenca me PD për këtë mandat është vetëm 35 vota, ndërsa shuma e votave të devijuara, sipas tyre të hequra nga LZHK dhe të shtuara për PD janë më shumë se 35.
Tropojë
Bindja Demokratike ka kundërshtuar rezultatin në Tropojë sa i përket Këshillit Bashkiak, duke pretenduar se vëzhguesit e tyre, në kutinë e votimit nr 0522 kanë konstatuar se në ekranin e numërimit atyre i kanë rezultuar 99 vota, ndërsa në procesverbal janë pasqyruar vetëm 86 vota. Po ashtu, BD pretendon se gjatë numërimit të 4 kutive të tjera, votat nuk janë shfaqur në ekran për shkak të problemeve me sistemin, duke i konsideruar rezultate e tyre si të dyshimta. Ata kërkojnë rinumërim të votave në këto kuti, duke pretenduar për një mandat në Këshillin Bashkiak Tropojë.
Gjirokastër
Në Gjirokastër diferenca për një votë i dha PR një këshilltar bashkiak për të cilin ADSH thotë se i takon asaj.
“Duke qenë se mandate jonë është marrë nga PR për 1 votë kërkojmë nga ana juaj rinumërimin e votave të vlefshme dhe të pavlefshme në QV 4242, lagjja Lunxhëri dhe 4262,Lazarati dhe 4310
Dhe ndryshimin e tabelës për rezultatin e këshillit bashkiak në Gjirokastër duke përfshirë procesin e rivlerësimit dhe rinumërimit të votave pasi na mungojnë 8 vota me të cilat përkthehen në marrjen e mandatit të këshillit bashkiak Gjirokastër” thuhet në ankimimin e tyre”
Po përse është i rëndësishëm përfaqësimi në këshillin bashkiak?
Ndonëse duket pak “sipërfaqësor” ky përfaqësim në raport me kryetarin e Bashkisë, rëndësia e këshilltarëve është shumë e madhe, pasi ata përbëjnë autoritetin e qartë të këshillit për të vepruar në emër të banorëve të komunitetit që përfaqësojnë.
p.k\dita
