Argjentinasit jetojnë në radhë të parë për futbollin, pastaj për të tjerat… Është një çmenduri e vërtetë ajo çfarë ndodh në Argjentinë kur Lionel Messi del për të darkuar. Ndërsa kombëtarja grumbullohet për dy miqësoret me Panamanë dhe Kuraçaon këtë javë, për herë të parë që pas ngritjes së trofeut të Kupës së Botës më 18 dhjetor 2022, që u vendosi yllin e tretë në fanelë, tifozët kanë kaluar në ekstazë. Këto dhjetë ditë pritet të jenë vetëm festë, pasi skuadra nuk ka angazhime në kompeticione, por po shfrytëzon dy datat e lira për të kënaqur mbështetësit. Dhe në këtë kuadër ka qenë çmenduri ajo që ka ndodhur mbrëmjen e së enjtes në kryeqytetin argjentinas Buones Aires.
Sulmuesi i Paris Saint-Germain doli për të darkuar jashtë, por ky lajm me sa duket u përhap me shpejtësi. Brenda pak minutave një turmë bllokoi trafikun edhe në lagjen Palermo të Buenos Aries, pasi donin të shihnin nga afër kampionin e tyre të Botës. Me mijëra tifozë rrethuan restorantin, madje mësynë edhe brenda tij, pak metra larg tavolinës ku darkonte Messi me familjen e tij.
Darka kaloi me ‘serenata’ e këngë patriotike që iu kënduan yllit të kombëtares, që nga koha e Maradonës, vetëm e vetëm pse u solli trofeun e tretë të Kupës së Botës në shtëpi, atë që e prisnin prej 36 vitesh. Dhe për më keq akoma, pas përfundimit të darkës, Messit i është dashur e gjithë mbështetja e Komisariatit të Policisë për ta nxjerrë nga turma gjigante, sepse në të kundërt s’do të kishte dalë dot… Messi ndodhet në Argjentinë me kombëtaren e tij, ku të premten do të luajë një ndeshje miqësore kundër Panamasë në “Monumental”.
