Arka e shtetit po vijon të mbushet, madje më shumë se parashikimet më optimiste. Të dhënat nga Ministria e Financave dhe Ekonomisë tregojnë se nga janari ne qershor buxheti u shtua me 320 miliardë lekë.
Nëse do ta krahasonim me të njëjtën periudhë të vitit të shkuar, kjo është një shifër 40.24 miliardë lekë më shumë. Po ashtu ajo flet për 18.3 miliardë më tepër se sa ishte planifikuar për tu mbledhur.
“Sa i takon perfomancës ekonomike, të dhënat flasin për një situatë ekonomike modeste rritëse por është larg potencialeve që ka ekonomia dhe pritshmërive që kanë bizneset dhe qeveria. Ajo që mund të thuhet se rritja e çmimeve nuk mund të mos çonte në rritjen e TVSH dhe tatim fitimit deri diku”, shprehet Zef Preçi, nga Qendra për Kërkime Ekonomike.
Të ardhurat e kënaqshme duket se kanë lejuar qeverinë të tregohet më “dorëlëshuar’ te shpenzimet. Duke parë të të dhënat nga “financat” kuptojmë se gjysmën e pare të vitit dolën nga buxheti i shtetit 273.8 miliard lekë, 9.6 miliardë më shumë se një vit më parë.
Me gjithë shpenzimet e shkuara, të ardhurat në nivele rekord kanë bërë që ekonomia e vendit ta mbyllë 6-mujorin e pare të vitit në mënyrë pozitive. Kemi një suficit prej 46.1 miliard lekësh nga raporti mes të ardhurave dhe shpenzimeve.
“Është krijuar ideja për zhvillimin e Shqipërisë më tej por në fakt ka pasur një copëtim të fondeve dhe nxitim për të kënaqur shtresa dhe grupe të caktuara. Realizimin se shoh të lidhur me të mirën publike”, tha Zef Preçi.
Ajo çfarë qeveria duhet të bëjë sipas këshillave të ekspertëve është rishpërndarja e fondeve shtesë të grumbulluara drejt shtresave më në nevojë, të cilat në buxhetin e tyre nuk po njohin lulëzim, teksa vijojnë të goditen nga kriza e çmimeve.
