Kreu i partisë më të madhe opozitare në Turqi, Umit Erkol, është arrestuar dhe është dërguar në paraburgim, si pjesë e një hetimi për raste korrupsioni. Erkol, kryetar i Organizatës Provinciale të Ankarasë të Partisë Republikane Popullore (CHP), u ndalua së bashku me tetë persona të tjerë si pjesë e një hetimi mbi parregullsi të dyshuara në një kontratë midis bashkisë së Izmirit dhe kooperativës së ndërtimit të Izbetonit.
Sipas prokurorit të Izmirit, hetimi ka të bëjë me akuza për përvetësim fondesh, mashtrim dhe falsifikim të dokumenteve zyrtare dhe moskryerje të detyrave mbikëqyrëse.
Arrestimi u denoncua nga kryetari i bashkisë së Ankarasë, Mansur Yavas, gjithashtu një zyrtar i CHP-së, duke pretenduar se nuk kishte arsye për ndalim. Ai deklaroi në një postimin e tij se, Erkol është një figurë e njohur, me një adresë të qartë dhe rol publik, duke theksuar se nuk ka rrezik arratisjeje ose ndryshimi të informacionit.
“Në këto rrethana, nuk mund të flasim për drejtësi”, theksoi ai.
Opozita turke është nën presion pas arrestimit dhe paraburgimit të kryetarit të bashkisë së Stambollit Ekrem Imamoglu në mars 2025, i cili është në gjyq që nga 9 marsi për korrupsion, së bashku me 413 të bashkëpandehur.
Imamoglu, të cilin CHP e ka nominuar si kandidat në zgjedhjet presidenciale të planifikuara për maj 2028, konsiderohej favoriti dhe i vetmi i aftë për të mposhtur Presidentin Tayyip Erdogan, i cili ka qenë në pushtet që nga viti 2003 dhe u rizgjodh në vitin 2023.
Katër kryetarë bashkie të CHP-së, përfshirë kryetarin e bashkisë së Bursës (Turqia veriperëndimore), qyteti i katërt më i madh i vendit të cilin opozita e fitoi në vitin 2024, janë arrestuar që nga fillimi i gjyqit.
j.l./ dita
