Shkon në 310 numri i personave që kanë marrë ndihmë mjekësore për shkak të lëndimeve të pësuara gjatë protestave në Tiranë, që prej datës 13 tetor. Sipas përditësimit të autoriteteve shëndetësore, deri në orën 21:00 të mbrëmjes së të hënës, mes të lënduarve janë 191 punonjës policie, 88 protestues dhe 31 kalimtarë.
Gjatë ditës së hënë, në Spitalin Universitar të Traumës janë paraqitur për ndihmë mjekësore katër kalimtarë. Njëri prej tyre, përfaqësues i medias ndërkombëtare, ka lënë spitalin pas marrjes së trajtimit, në gjendje jashtë rrezikut për jetën.
Aktualisht, në këtë spital ndodhen dy kalimtarë, të cilët po kryejnë ekzaminimet e nevojshme. Një tjetër person i lënduar gjatë protestës është larguar pasi ka marrë trajtimin mjekësor.
Ndërkohë, në Qendrën Spitalore Universitare “Nënë Tereza” janë paraqitur tre persona për të marrë ndihmë mjekësore: një efektiv policie, një protestues i mitur dhe një përfaqësues i medias.
Sipas informacionit zyrtar, të tre personat paraqiten në gjendje shëndetësore stabël.
Bilanci i të lënduarve përfshin rastet e regjistruara që prej 13 tetorit, gjatë protestave të zhvilluara në kryeqytet.
