Një ngjarje e rëndë ka tronditur sot Zvicrën dhe komunitetin ndërkombëtar: një zjarr masiv në një bar të frekuentuar gjatë festimeve të Vitit të Ri ka shkaktuar dhjetëra viktima dhe qindra të lënduar në resortin e njohur skijor Crans-Montana.
Rreth orës 01:30 të mëngjesit, zjarri shpërtheu në barin “Le Constellation”, ku shumë njerëz – përfshirë turistë dhe të rinj që po festonin – ishin mbledhur për të festuar Vitin e Ri. Flakët u përhapën shumë shpejt, duke kapur mjaft persona në ambiente të ngushta dhe duke shkaktuar panik dhe kaos.
Autoritetet kanë raportuar se të paktën 47 persona kanë humbur jetën dhe më shumë se 100 të tjerë janë plagosur, shumë prej tyre seriozisht dhe me djegie të rënda. Identifikimi i viktimave dhe njoftimi i familjarëve është duke u bërë aktualisht.
Shërbimet e emergjencës dhe ekipet mjekësore kanë mobilizuar dhjetëra ambulanca dhe helikopterë për të transportuar të plagosurit në spitale të ndryshme, ndërsa disa janë dërguar në qendra të specializuara për trajtime të rënda.
Shkaku i zjarrit mbetet nën hetim; autoritetet zvicerane kanë përjashtuar që në këtë fazë çdo veprim të qëllimshëm apo terrorist, duke u fokusuar në rrethanat që shkaktuan shpërthimin.
Ministria e Jashtme e Shqipërisë konfirmoi se deri më tani nuk raportohet të ketë qytetarë shqiptarë mes viktimave të identifikuar.
Kjo tragjedi vjen në momentin kur familje dhe miq ishin mbledhur për të festuar fillimin e vitit të ri, duke u kthyer në një prej ngjarjeve më të zeza sociale në Zvicër vitet e fundit.
o.p. / dita
