Arsenal i afrohet edhe një hap titullit kampion, pas fitores së rëndësishme që arriti sot ndaj Crystal Palace. Granit Xhaka gjeti përsëri golin dhe Arsenali harroi atë eliminim të dhimbshëm para tifozëve në mesjavë, nga Kupa e Ligës së Europës. Mesfushori me origjinë shqiptare ndëshkoi edhe Crystal Palace, në derbin e vlefshëm për kampionatin anglez.
Në “Emirates Stadium”, ishte skuadra e drejtuar nga Mikel Arteta që dominoi totalisht, duke mos e vënë asnjëherë në dyshim fitoren. Geksa golin e avantazhit e shënoi braziliani Martinelli, me një lëvizje të bukur në zonë.
Në fundin e pjesës së parë ishte Bukayo Saka, që depërtoi mirë në zonë dhe mposhti për herë të dytë portierin e Crystal Palace, duke dërguar “topçinjtë’ në dhomat e zhveshjes me avantazhin e dy golave.
Pjesa e dytë nisi sërish me gol dhe këtë herë ishte Granit Xhaka. Mesfushori u shërbye mirë në zonë, ku me një qetësi për t’u admiruar, kaloi topin poshtë këmbëve të portierit mik. Crystal Palace provoi të rihapë takimin, pasi shënoi me Schlupp në të 63-tën, megjithatë vetëm për pak, sepse në të 74-ën Saka shënoi edhe golin e katërt, duke vulosur suksesin. Me këtë sukses, Arsenali ngjitet në kuotën e 69 pikëve, 8 më shumë se Manchester City, teksa vlen të theksohet se kanë mbetur edhe 10 javë deri në fund të kampionatit dhe ‘qytetarët’ kanë ndeshje më pak.
