Media të ndryshme kanë publikuar sekuenca apo edhe emrat e grave dhe vajzave të përfshira pa dijeninë e tyre në këto video.
“Një raportim i tillë nuk i shërben interesit publik, por vetëm e thellon dëmin dhe riviktimizimin e tyre,” thuhet në deklaratën e AGSH-së.
Ngjarja e ditëve të fundit, ku pamje me karakter privat qarkulluan me shpejtësi në rrjetet sociale dhe aplikacionet e komunikimit, u shoqërua edhe me raportime në disa media online që ekspozuan detaje, pamje apo të dhëna që çuan në identifikimin publik të personave në video, duke nxitur një valë denigrimi në rrjet.
Lidhur me këtë situatë, Asociacioni i Gazetarëve të Shqipërisë shprehu shqetësim të thellë për mënyrën se si disa media dhe individë të lidhur me profesionin e gazetarisë kanë kontribuar në përhapjen e materialeve. Organizata u bëri thirrje të gjitha redaksive dhe gazetarëve që të ndalojnë menjëherë publikimin e videove, fotografive, emrave, inicialeve apo çdo informacioni tjetër që mundëson identifikimin e grave të përfshira.
Një pikë e veçantë shqetësimi në reagimin e Asociacionit lidhet me raportimet se ndër personat që kanë shpërndarë fillimisht këto materiale intime dhe kanë ndihmuar në përhapjen e tyre ka qenë edhe një gazetar.
AGSH theksoi se, nëse këto raportime konfirmohen, një veprim i tillë bie në kundërshtim të plotë me parimet themelore të etikës dhe përgjegjësisë profesionale të fushës.
“Gazetarët duhet të mbrojnë dinjitetin dhe privatësinë e viktimave, jo të bëhen pjesë e cenimit të tyre të mëtejshëm,” vijon reagimi.
AGSH vuri në dukje se krahas përgjegjësisë penale për ndërhyrje në të dhënat kompjuterike dhe cenim të jetës private, Kodi i Etikës së Gazetarit ndalon rreptësisht identifikimin e viktimave të abuzimit dhe publikimin e materialeve që cenojnë dinjitetin njerëzor pa ekzistuar një interes i lartë dhe i mirëfilltë publik.
Ndërkohë Drejtoria Vendore e Policisë Tiranë njoftoi se ka nisur hetimet kryesisht pas publikimit dhe shpërndarjes masive në disa portale dhe platforma online të materialeve filmike me përmbajtje intime të personazheve të njohura.
Përmes një njoftimi zyrtar, Policia e Tiranës bëri të ditur se Sektori për Hetimin e Krimeve Kibernetike ka nisur veprimet hetimore për të identifikuar adresat IP dhe të dhënat e tjera të faqeve apo profileve që kanë publikuar dhe shpërndarë këto materiale. Paralelisht, autoritetet po ndjekin procedurat për fshirjen dhe heqjen e videove nga platformat online ku janë ngarkuar. / Reporter.al
