Autoritetet e dikasterit të shëndetësisë bëjnë me dije se QSUT është spitali i radhës, që po përgatitet për të marrë autonominë menaxheriale, e cila mundëson më shumë hapësira vetë-administrimi të burimeve njerëzore, shpërblime në bazë performance dhe rritje të aftësive të stafeve. Spitali “Memorial Rajonal Fier”, ishte spitali i parë publik që në fillim të këtij muaji, përfitoi Kartën e Autonomisë Menaxheriale.
Marrja e këtij statusi, u jep mundësinë spitaleve publike të kenë mekanizmat e duhur ligjorë dhe rregullatorë për t’u vetadministruar për nga pikëpamja menaxheriale dhe financiare, për rritjen e konkurrueshmërisë ndërmjet spitaleve publike ndërmjet njëri-tjetrit, por dhe me spitalet jopublike, për rritjen e cilësisë së shërbimit shëndetësor për qytetarët, mirëmenaxhimit të burimeve njerëzore dhe rritjes së instrumenteve dhe mekanizmave për punësimin e mjekëve specialist në sektorin publik, si dhe rritjes së gamës së shërbimeve në spitalet publike, duke i dhënë fund epokës së centralizimit të shërbimeve shëndetësore publike të nivelit terciar vetëm në spitalet universitare.
Një ditë më parë është inauguruar edhe spitali i ri i Sëmundjeve të Brendshme në QSUT, i ndërtuar që nga themelet, për të përmirësuar cilësinë e kujdesit dhe të shërbimeve për pacientët shqiptarë.
Spitali Qendror i Sëmundjeve të Brendshme ka një kapacitet prej 345 shtretërish, ku akomodohen 14 shërbime mjekësore spitalore të specializuara, duke nisur nga kardiologjia, nefrologjia, hematologjia, gastrohepatologjia, mjekësia interne, endokrinologjia, dermatologjia, rheumatologjia, alergologjia, urgjenca dhe imazheria. Ndërtimi i këtij spitali është cilësuar si një ndër veprat më të mëdha të tre dekadave të fundit në shëndetësi.
Foto\ Spitali i ri Qendror i Sëmundjeve të Brendëshme në QSUT
p.k\dita
