Avokati i deputetëve të Partisë Demokratike, Marash Logu, ka folur pas seancës së ditës së sotme në Gjykatën Kushtetuese për kërkesën e bërë nga opozita për shfuqizimin e VKM-së për ndërtimet pa leje.
Ai tha se shtyrja e seancës ka qenë e panevojshme dhe se ka shërbyer vetëm për t’u dhënë kohë që të zgjidhnin problematikat që ka VKM-ja. Gjithashtu ai ka thënë se nuk kanë marrë asnjë përgjigje për pyetjet dhe për shqetëesimet e ngritura në Këshillin e Ministrave.
“Nuk u mor asnjë lloj përgjigje për të gjitha ato pyetje e shqetësime që kishim për Këshillin e Ministrave. I bënë bisht përgjigjes se pse nëpërmjet kësaj VKM-je synojnë të theksojnë pabarazinë e qytetarëve përpara ligjit.
Pabarazia e trajtimit të qytetarëve në raport me biznesmenët është një nga arsyet pse Gjykata Kushtetuese duhet të vendosë shfuqizimin e kësaj VKM-je si të papajtueshme me Kushtetutën. Në një shtet ku demokracia dhe shteti i së drejtës nuk funksionon në fillim nxirret VKM-ja pastaj një ligj. Kjo ka ndodhur në rastin konkret. Më 7 shtator 2022 është miratuar VKM-ja, ndërsa më 17 mars 2023 është nxjerrë një projektligj që ka për synim të rregullojë ato aspekte problematike që ka VKM-ja.
Shteti i së drejtës, demokracia dhe të drejtat e qytetarëve janë në rrezik serioz. Të gjitha përpjekjet që bëri qeveria për të shtyrë procesin në Gjykatën Kushtetuese janë për t’i dhënë kohë për të rregulluar disa problematika që ka kjo VKM”, deklaroi Marash Logu.
m.b./dita
