Ministrja e Infrastrukturës dhe Energjetikës, Belinda Balluku ka inspektuar punimet në tunelin e Llogarasë, ku ka bërë me dije se janë betonuar përreth 2 kilometra.
Balluku përsëriti rëndësinë e përfundimit të punimeve në qershor të 2024, ndërsa shtoi se tuneli plotëson të gjitha parametrat e sigurisë rrugore sipas kritereve të Bashkimit Europian, duke e konsideruar si xhevahirin e kurorës së infrastrukturës së Shqipërisë.
“Në tunelin e Llogarasë, ku janë betonuar afro 2 kilometra dhe po vijon puna për vendosjen e të gjithë elementëve të tjerë të nevojshëm për këtë vepër Ecuria është e mirë, problematikat janë të zgjidhshme. Nuk ka problematika që krijojnë vonesa. Kemi betonuar 1660 metra. Ecuria për hidroizolimin ka arritur në 1800 metra. Portali dalës nga Palasa ka qenë i armatuar, këtu jemi në portalin e krahut të Dukatit i përfunduar dhe armatuar. Jemi në 400 metrat e fundit në tunelin e emergjencës. Kemi hapur daljet lidhëse të dy tuneleve. Është tunel 6 km, që cilësohet si tunel i gjatë. Për arsye të sigurisë rrugore ka 11 dalje. Për tunelin e emergjencës kanë ngelur 400 metrat e fundit, ndërkohë që ka përfunduar puna për 5 km e tjetrë. Është shumë e rëndësishme që ky tunel kur të përfundoj, ashtu siç e kemi premtuar, në qershor të 2024, të gjitha veprat infrastrukturore të jugut të Shqipërisë do të jenë të ndërlidhura”, tha Balluku.
p.k\dita
