Pas aksionit per shembjen e objekteve pa leje banorët e Thethit u ngritën në protestë. Ata bllokuan urën në hyrje të fshatit, pati tensione edhe me policinë. Ata thonë se është e papranueshme ndërhyrja, sidomos në mes të sezonit.
Për thuajse dy orë, banorët e Thethit bllokuan urën në hyrje të fshatit, teksa po protestonin kundër aksionit të prishjes së 40 objekteve pa leje. Protesta u shoqërua me tensione me policinë. Banorët kërkuan që shteti të ndalë prishjen e objekteve, aksion të cilin e cilësuan si masakër që po kryhet në mes të sezonit turistik.
“Duhet ta mbrojmë por jo të dhunohemi. Nuk kemi bërë asnjë krim, thjesht kemi përmirësuar shtëpitë e të parëve tona. Është krenari për Shqipërinë. Shteti shqiptar po bën masakër. Ne po kërkojmë më minimalen”, u shpreh një banor që ka investuar në fshat, duke e cilësuar si të papranueshme aksionin në mes të sezonit.
Një tjetër banor, i cili ndonëse me aftësi të kufizuara doli në protestë, tha se po humbin investimet e bëra nga kursimet e jetës. Me lot në sy, ai tha se ka ngritur vetëm 5 shtëpi prej druri, dhe nuk ka asnjë pëllëmbë beton.
