Bashkimi Europian ka bërë një lëvizje diplomato-politike interesante. Luigi Soreca do të rikthehet sërish në Shqipëri, si ambasador i organizatës më të madhe europiane, pas largimit të ambasadores që i mbaroi mandati.
Ish ambasadori do të marrë detyrën përkohësisht më 1 shtator dhe do të drejtojë Delegacionin e BE-së në Tiranë deri në ardhjen e Shefit të ri të Delegacionit.
Ndërkohë ambasadorja aktuale Christiane Hohmann u largua para kohe nga vendi ynë, pasi u desh të rikthehej në Shërbimin e Jashtëm Gjerman nga 1 shtatori 2023, për detyrën e saj të ardhshme të lartë. Ajo mund të shkojë në Irak si ambasadore e Gjermanisë.
Para se të niste detyrën në Shqipëri, në gusht 2022, Christiane Hohmann ishte ambasadore e Gjermanisë në Estoni.
Soreca ka shërbyer si ambasador në vendin tonë për tre vite e shtatë muaj. Ai erdhi në Tiranë në shtator të vitit 2018 dhe u largua në prill të 2022.
Ky do jetë thjesht një rikthim i përkohshëm i diplomatit italian, në motive ende të paqarta, teksa në vijim pritet të mësohen edhe argumentet nga BE-ja. Në mandatin e kaluar Soreca pati një detyrë përgjithësisht të qetë dhe të mirëmenaxhueshme.
