Gjykata Europiane e të Drejtave të Njeriut ka refuzuar që të shqyrtojë ankesat e Francesco Becchetit kundër shtetit shqiptar. Pretendimet e Becchetit si dhe bashkëpunëtorëve të tij janë konsideruar si të papranueshme.
Në këtë mënyrë Francesco Beccheti ka humbur edhe një betejë në luftën që i ka shpallur shtetit shqiptar, pas problemeve me drejtësinë në vendin tonë.
Kështu në 19 Tetor 2023, GJEDNJ njoftoi me shkrim se trupi gjykues e ka shpallur të papranueshme kërkesën e Becchetit, nënës së tij Liliana Condomitti dhe bashkëpunëtorëve Mauro De Renzis, Erjona Troplini, duke refuzuar shqyrtimin e çështjes së paraqitur prej tyre në gjykatë.
Ankuesit pretendonin ndër të tjera pranë GJEDNJ se postimet në Twitter të Kryeministrit Rama sipas tyre shkelnin të drejtën për t’u prezumuar të pafajshëm.
Në vendimin e zbardhur GJEDNJ i kujton Becchetit se nuk është i vërtetë pretendimi i tij që Shqipëria nuk ka mjete juridike efektive që mund të shfrytëzoheshin për të trajtuar prezumimin e pafajësisë.
GJEDNJ i ka kujtuar Becchetit që të mos injorojë institucionet shqiptare të drejtësisë, përpara se të ankohej në drejtësinë evropiane.
Becchetin akuzohet për 4 vepra penale, ndër to ndërtimin e skemave mashtruese lidhur me tatimin mbi vlerën e shtuar për të cilën ka marrë një dënim prej 17 vitesh burg.
Biznesmeni italian vazhdon të jetë në arrati dhe për të ka edhe një mandat arresti ndërkombëtar të lëshuar nga autoritetet e drejtësisë shqiptare.
