Kandidati i Partisë Demokratike, Roland Bejko ka dalë në një konferencë për shtyp nga selia e PD, pas një takimi me përfaqësues të OSBE/ODIHR. Bejko tha se i ka bërë me dije përfaqësuesve të ODIHR shkeljet ligjore që po bëhen në fushatë nga qeveria dhe kandidati i saj dhe jo vetëm. Kandidati i PD shtoi se ata po pengohen për fushatën dhe se ende nuk kanë marrë asnjë qindarkë nga fondi i KQZ.
“Patëm në mjediset e PD, përfaqësues të ODIHR, i bëmë të ditur atyre problematikat e fushatës, që kanë të bëjmë me ndërhyrjet e qeverisë në shkeljet e ligjit për punësimet. Janë 3 mijë të punësuar në këto kohë. Në aspektin tjetër informuan ODIHR për rritjen e pagave dhe pensioneve dhe hapjen e investimeve në periudhën e zgjedhjeve. I informuan edhe për rolin e patronazhistëve. Në fund ne informuan ata për raportin që ne si PD kemi me mediat, ku qartë mediat e mëdha të vendit vazhdojnë ta quajnë Berishën kryetar të PD, që është në shkelje të ligjit. Po ashtu informuam përfaqësuesit e ODIHR edhe me shkeljet që kemi vënë re në terre, ku qytetarët janë të shantazhuar me vendin e punës si edhe me investimet e Veliajt që ka veshur rrugët me një tapet të hollë asfalti. E fundit është, raporti që ndërton qeveria me pjesën tjetër të mediave duke ia marrë kohën opozitës dhe duke ia dhënë kandidatëve të “Foltores”. E kuptojmë mirëkuptimin e Ramës, Metës dhe Berishës, sepse ata janë një dhe nuk duan që t’i futet një operator tjetër. Sot partia Demokratike ende nuk ka marrë asnjë qindarkë nga fondet e KQZ-së. PD është penguar për fushatën sepse në mjediset publike ne nuk jemi shfaqur me banare. Të gjitha ambientet i ka marrë PS dhe Koalicioni “Bashkë Fitojmë”, tha Bejko.
