Në një intervistë për emisionin “N’xhiro me Syçin” me Ilir Demaliaj, ish-kandidati për kryetar të Bashkisë së Tiranës, Roland Bejko, komentoi situatën politike dhe historinë e krijimit të Partisë Demokratike, duke e lidhur me përmbajtjen e librit të Demaliajt.
Ai kritikoi modelin e Berluskonit, duke vënë në dukje se Berluskoni e krijoi vetë partinë, ndërsa Partia Demokratike në Shqipëri u formua në një moment historik të jashtëzakonshëm, me ndikimin amerikan: “Partinë Demokratike në Shqipëri e krijuan amerikanët… Ata krijuan frymën që erdhi.”
Gjithashtu, Bejko shprehu shqetësim për manipulimin e historisë së asaj periudhe dhe mungesën e analizës reale: “Ne po manipulojmë dhe falsifikojmë historinë që e kemi jetuar vetë.”
Duke folur për librin e Ilir Demaliajt, Bejko e vlerësoi titullin si shumë të goditur: “Titulli i librit është më i godituri, sepse guri i fundit i dominos është Shqipëria. Skema e rrëzimit të komunizmit ishte sistemi domino dhe dominoja e fundit ishte Shqipëria.”
Ilir Demaliaj dhe Bejko diskutuan gjithashtu për ndikimin e lëvizjes studentore dhe situatën ekonomike të Shqipërisë në atë kohë, duke nxjerrë në pah kapitullimin total të qeverisë dhe rëndësinë e ngjarjeve historike që shpesh nuk analizohen me kujdes.
n.s. / dita
