Kreu i PDIU, Shpëtim Idrizi ka postuar sot një foto të kandidatit për Bashkinë e Himarës, Fredi Beleri.
Idrizi ironizon kandidatin e dyshes Berisha-Meta, duke shkruar:
“Shqiponja në flamur nuk simbolizon shqiponjën shqiptare, as shqiponjën bizantine. Shqiponja në këtë flamur simbolizon thjesht vetullat e Fredit”.
Reagimi i Idrizit vjen pas deklaratave të sotme të Taulant Ballës dhe vetë Belerit.
Kreu i grupit të PS, Balla, në një komunikim me gazetarët të hënën, u shpreh se u qëndron akuzave të bëra më parë për kandidatin Beleri. Ai tha se Bejleri është një person i dënuar me vendim gjykate për masakrën e Peshkëpisë, ndërsa shtoi se turpi është i PD që e kandidon.
Në masakrën e Peshkëpisë, një njësi terroriste greke vrau dy ushtarë shqiptarë dhe plagosi tre të tjerë.
Fredi Beleri u pyet po sot nga media nëse ai mund të kandidojë për bashkinë e Himarës, duke qenë se është një ish i dënuar. Balla e përmendi gjithashtu, pamundësinë e një kandidimi të tillë. Por Beleri thotë se ai mundet të kandidojë.
“Nuk vendos Balla se kush kandidon apo jo. Vendos ligji. Kolegji Zgjedhor është shprehur se kandidimi im ishte i pamundshëm deri në korrik 2019. S’e di pse ndërhyn Balla në institucione të pavarura” – u shpreh Beleri.
Kreu i PDIU, Idrizi, u shpreh se do ta padisë Belerin në Prokurori për shkelje të integritetit të shtetit shqiptar.
Beleri përgjigjet se do ti hedhë në gjyq edhe Ballën, edhe Belerin.
“Zoti Balla do ta marrë përgjigjen në gjykatë, duhet të sjellë prova kur dhe si jam dënuar. E pres edhe Idrizin në gjyq. Sa më shumë t’u bëj thirrje Idrizi himarjotëve, aq më shumë ata do të më votojnë. PDIU ka marrë herën e fundit dy vota. Tani që po flasim, ata bëjnë fushatë për mua”, – thotë kandidati Beleri.
i.b. / dita
