I pyetur gjatë një interviste në kanalin TV Klan, mbi deklaratën e një jave më parë të kryeministrit Rama, ish-zv/kryeministri Arben Ahmetaj u shpreh se nuk ka nevojë për mbrojtjen e tij.
Rama tha se nëse “akuzat janë të vërteta më vjen shumë keq, por nuk e ndihmoj dot”, ndërsa Ahmetaj u përgjigj se nuk do donte të ishte në vendin e kryeministrit, si gjykatës.
Unë Edi Ramës nuk i kam kërkuar ndonjëherë ndihmë. Po them vetëm kaq. Nuk do desha të isha në vendin e Kryeministrit në pretendimin për të bërë gjykatësin. Ai për mua, të bëjë atë që bën më mirë, kryeministrin. Gjykatësi është çik i sikletshëm, duhet të njohësh procedurat me detaje.
Ahmetaj u pyet nëse ka frikë mos përfundon si Sajmir Tahiri. Ai u përgjigj:
Unë me Saimir Tahirin s’kam shkuar fare. Por dhimbja që të shoh një ish-koleg në atë situatë është shumë e madhe. Burrat kur lindin dhe bëhen burra, i marrin parasysh të gjitha.
Një javë më parë, Rama u pyet se përse Arben Ahmetaj u zhduk nga zv/kryeministër dhe nga drejtimi i qarqeve në parti, pra nuk po figuron askund. Ai u përgjigj:
“Sa i përket çështjes së Arben Ahmetajt, ai ka qenë bashkëpunëtori im, kam punuar me të për një periudhë kohe të gjatë dhe këto gjëra që dalin, në qofshin të vërteta, gjë që do ta thotë prokuroria, më vjen shumë keq. Më vjen shumë keq, por nuk e ndihmoj dot. Në qofshin të vërteta”.