Eksportet kanë vijuar rënie dyshifrore edhe gjatë qershorit ndikuar së tepërmi nga zhvlerësimi i fortë i euros, por edhe rënia e çmimeve në tregjet ndërkombëtare.
Të dhënat e fundit të INSTAT tregojnë se vlera e eksporteve në qershor arriti në 38 miliardë lekë, duke u tkurrur me 17.3% krahasuar me një vit më parë.
Ndërsa si raport 6-mujor, vlera e mallrave të eksportuara në vendet partnere arriti në 234 miliardë lekë, duke u ulur me 7.4% në pjesën e parë të vitit.
Ndikimin më të madh në frenimin e eksporteve muajin e kaluar e dhanë grupet e materialeve të ndërtimit që shënuan edhe rënie të konsiderueshme, ndjekur nga mineralet e lëndët djegëse si dhe tekstilet e këpucët, që janë edhe grupi më i madh eksportues në vend.
Qeveria ka miratuar ndërkohë aktin normativ duke shtyrë pagesën e tatimfitimit për t’iu ardhur në ndihmë eksportuesve që po preken nga dobësimi i fortë i euros.
E kundërta ka ndodhur me mallrat ushqimore pasi ishin i vetmi grup eksportet e të cilave u rritën me 4.6% përgjatë qershorit. Sa i takon vendeve drejt të cilave Shqipëria ka shënuar rritje të eksporteve janë Italia, Greqia dhe Spanja.
Të njëjtin trend kanë ndjekur edhe importet, duke u ulur me 7.5% muajin e kaluar, ndërsa ka qenë me e moderuar rënia si raport 6-mujor. Vlera totale e mallrave të importuara në fund të qershorit arriti në 439 miliardë lekë.
Ndërsa deficiti tregtar, pra diferenca eksport-import arriti në 204 miliardë lekë në pjesën e parë të vitit, duke u rritur me gati 6% krahasuar me të njëjtën periudhë të një viti më parë.
p.k\dita
