Përshkallëzohet konflikti mes pronarit të një subjekti të makinave me qira dhe grupit rival, me një tjetër sulm ndaj të parit. Ngjarja ka ndodhur dje në aksin Korçë-Pogradec, ku një makinë e rëndë “Hummer” ka përplasur me dashje veturën në pronësi të Eris Çekanit. Bëhet me dije se ngjarja ka ndodhur rreth orës 08:00, ku shtetasit Mario Xhangolli, 30 vjeç dhe Sindi Syzo, 28 vjeç, akuzohen se kanë përplasur me dashje mjetin e Eris Çekanit, 39 vjeç, banues në Pogradec.
Pas përplasjes, të dy shtetasit kanë dalë nga automjeti, kanë kanosur shtetasin Çekani, i kanë dëmtuar atij me sende të forta automjetin dhe janë larguar me shpejtësi nga vendngjarja. Gjatë largimit, për shkak të shpejtësisë, automjeti tip “Hummer” është përplasur me një automjet tjetër, me pasojë vetëm dëme materiale. Policia ka shpallur në kërkim dy autorët e dyshuar.
Kujtojmë që vetëm pak ditë më parë Çekanit i kishin vendosur GPS poshtë mjeteve në kompaninë e makinave me qira. Për këtë ngjarje ai akuzoi Syzon. Personat në fjalë kanë pasur shpesh përplasje, teksa katër prej tyre u ndaluan për incidentin e parë. Muaj më parë, pothuajse e njëjta skenë sulmi u shënua në Elbasan, ku Çekani u ndoq dhe më pas u përplas nga një makinë tip “Golf”, ku brenda saj dyshohet se kanë qenë Sindi Syzo, Brian Syzo dhe Mario Xhangolli.
