Donald Trump ka njoftuar një bllokadë totale dhe të plotë të të gjitha cisternave të naftës që transportojnë naftë nga Venezuela.Në mediat e huaja shkruhet se vendi është i rrethuar nga forca më e madhe detare e vendosur ndonjëherë në Amerikën e Jugut dhe se Trump akuzon regjimin e Nicolas Maduros për terrorizëm, trafik droge dhe trafikim qeniesh njerëzore. Në këtë deklaratë në rrjetin e tij social, Donald Trump thotë se Venezuela është plotësisht e rrethuar nga një forcë ushtarake detare e paparë, e cila, siç vëren ai, do të vazhdojë të rritet.
Sipas tij, presioni me të cilin do të përballet Karakasi do të jetë si kurrë më parë për derisa e gjithë nafta, toka dhe asetet që sipas tij, janë marrë në mënyrë të paligjshme nga interesat amerikane t’u kthehen Shteteve të Bashkuara.
Trump e përshkruan regjimin e Nicolas Maduros si të paligjshëm dhe e akuzon atë për përdorimin e të ardhurave nga fushat e vjedhura të naftës për të financuar, ndër të tjera, narkoterrorizmin, trafikimin e qenieve njerëzore, vrasjet dhe rrëmbimet. Për këto arsye qeveria venezueliane është përcaktuar nga SHBA-të si një ‘Organizatë e Huaj Terroriste’.
Në këtë kontekst, Donald Trump njofton se po urdhëron një bllokim total dhe të plotë të të gjitha cisternave të naftës nën sanksione si kur hyjnë ashtu edhe kur dalin nga Venezuela, pa dhënë detaje të mëtejshme mbi metodën e zbatimit ose kohëzgjatjen e masës.
Sipas mediave, Trump i referohet çështjes së imigracionit, duke pretenduar se emigrantët dhe kriminelët e paligjshëm të cilët u dërguan në Shtetet e Bashkuara nga regjimi i Maduros gjatë periudhës së administratës së Joe Biden, tani po kthehen me një ritëm të shpejtë” në Venezuelë.
“Amerika nuk do të lejojë që kriminelët, terroristët ose shtetet e tjera të grabisin, kërcënojnë ose dëmtojnë kombin tonë. Shtetet e Bashkuara nuk do të tolerojnë një regjim armiqësor që përvetëson naftën, tokën ose pasuritë e tjera amerikane”, tha Trump.
j.l./ dita
