Bojkotojeni Veli Myftarin! Thirrje dhe deklaratë e tre nënkryetarëve dhe kryetarit të Tiranës lidhur me problemet e brendshme në kryesinë e Komitetit Kombëtar të Organizatës së Veteranëve dhe Pasardhësve të LANÇ të Popullit Shqiptar
Duam të informojmë opinionin publik lidhur me zhvillimet në Komitetin Kombëtar të Organizatës së Veteranëve dhe Pasardhësve të LANÇ:
Veprimet antiligjore të z. Veli Myftari vazhdojnë. Këtë të hënë më 20.03.2023 në orën 11 z. Veli Myftari, duke abuzuar me detyrën e sekretarit të Përgjithshëm në Komitetin Kombëtar ka thirrur në mbledhje kryetarët e Komiteteve të Veteranëve në bashki, pas shkrimeve në gazetën DITA.
Z. Veli harron që Organizata e Veteranëve dhe e Pasardhësve të LANÇ është shumë mirë e organizuar dhe strukturuar. Është e shtrirë dhe funksionon në nivel kombëtar. Ka struktura vendimmarrëse nga baza në qendër dhe frymë të lartë kolegjialiteti e besueshmërie. Ka autoritet e vlera të padiskutueshme në qëndrimin korrekt ndaj programit, misionit, dokumenteve bazë të ndërtimit e funksionimit të saj; ka organe vendimmarrëse kolegjiale.
Por z. Veli nuk i përfill strukturat e ligjshme vendimmarrëse dhe nuk është as luajal e as kolegjial. Ai nuk respekton statutin. Kështu veproi edhe këtë herë. Ne si nënkryetarë nuk patëm dijeni deri ditën e dielë mbasdite kur u interesuam dhe kërkuam vetë të marrim informacion.
Pavarësisht kësaj, ne kemi detyrë statutore të informohemi, të konsultohemi, të diskutojmë, të propozojmë, të marrim vendim në mënyrë kolegjiale për zgjidhjen e problemeve e mbarëvajtjen e punëve.
Ne nuk jemi pjesë e vendimmarrjes për këtë takim – mbledhje!
Z. Veli po përdor autoritetin e Organizatës, po shfrytëzon personalitetin, korrektësinë dhe përkushtimin e kryetarëve të komiteteve për të marrë në mbrojtje sekretarin e përgjithshëm. Ai i ngre nga Saranda në Tropojë për të mbuluar shkeljet e tij të vazhdueshme!
Këto sjellje dëmtojnë Organizatën, por vetëm përkohësisht, sepse kjo është tërësia e bijve dhe bijave të ish partizaneve të LANÇ!
Faktet provojnë që jo vetëm Profesor Tarifa, z. Spartak Braho, profesor Krisafi, profesor Xhufi kanë shumë të drejtë në shkrimet e tyre, por edhe të gjithë personalitetet e vendit dhe nga diaspora, që e konsiderojnë Organizatën e Veteranëve pasuri, vlerë të çmuar e nder të kombit, shqetësohen dhe i dënojnë veprimet, ambiciet, sjelljet e qëndrimet e z. Veli Myftari.
Ai nuk pret të zgjidhet, por synon të imponohet duke u vetëzgjedhur! Nuk e meriton të jetë, as në strukturat drejtuese të organizatës. Ai është fajtor nga të tri shkallët e gjykimit dhe i dënuar. Nuk është shpallur i pafajshëm!
Organizata e Veteranëve dhe e Pasardhësve të LANÇ-it ka kapacitete kualitative, të devotshëm e të përkushtuar që i bëjnë nder të propozohen e të miratohen nga strukturat vendimmarrëse.
Elidiana Canaj – nënkryetare
Vjollca Trebicka – nënkryetare
Murat Dardha – nënkryetar
Pelivan Hysi – kryetar i Komitetit të Veteranëve dhe Pasardhësve të LANÇ për bashkinë e Tiranës
Tiranë, më 19.03.2023
