Nënat që kanë lindur fëmijë nga janari deri në korrik kanë përfituar të gjitha së bashku, 12 mln euro. Kjo shumë është më e ulët se buxheti që kishte caktuar qeveria në fillim të vitit.
Në 7 muajt e parë të vitit, bonusi i bebeve i ka kushtuar buxhetit 12 mln euro. Për këtë periudhë qeveria priste të shpërndante 18 mln euro, por numri i lindjeve nuk ka korresponduar më shumën e planifikuar.
Shifra ka arritur në nivel të barabartë me të njëjtën periudhë të vitit 2019 kur nisi kjo iniciativë, ndërsa numri i lindjeve shënoi rënie vjetore rreth 7%.
Nga ana tjetër, në reduktimin e shpërblimeve për këtë program ka ndikuar edhe bllokimi i pagesave për emigrantët shqiptarë. Këtyre të fundit iu hoq e drejta për të përfituar çekun e bebes, me argumentin se nuk japin kontribut në Shqipëri dhe shpërblimi financiar për të përballuar shpenzimet spitalore të lindjes, bazohet tek politikat e shtetit ku jetojnë.
Bonusi i bebes i jepet nënës menjëherë pas lindjes, dhe faturohet 40 mijë lekë për fëmijën e parë, 80 mijë lekë për të dytin dhe 120 mijë lekë për beben e tretë.
Për gjithë vitin 2024, qeveria ka parashikuar 22 milionë euro, ndërsa në vitin 2023, vlera e përgjithshme e bonusit arriti në 33 milionë euro./Euronews
