Amancio Ortega, bosi i njohur i markës së veshjeve dhe tekstilit “Zara” në Spanjë, njeriu i 13-të më i pasur në botë, e gdhiu 2 majin, me një shtim pasurie prej 1,1 miliardë euro, si shpërblimi i parë i vitit që merr si aksioner i “Inditex”.
Kjo shumë është pjesë e parave që biznesmeni galician do të marrë si divident nga kompania që ka themeluar. Përfitimet e tij në vitin 2023 pritet të arrijnë në 2,2 miliardë euro, rreth 500 milionë më shumë krahasuar me një vit më parë.
Firma e tekstilit njoftoi se do t’i shpërblejë aksionerët e saj, pasi dividenti është rritur me 29 përqind, duke shkuar deri në 1.2 euro për aksion.
Të gjitha këto të ardhura i shtojnë ngritjes së Amancio Ortega në renditjen e revistës Forbes, e cila përfshin totalin e aseteve të pasurive më të mëdha në botë.
Aktualisht biznesmeni është në pozitën e 13-të me një pasuri të vlerësuar në 77,3 miliardë dollarë dhe i pari në Spanjë.
Revista ekonomike e sipërpërmendur nxjerr në pah aktivitetin ekonomik të kryer nga Ortega, bazuar në investimet e dividentëve të tij në pasuri të paluajtshme në qytete si Madridi, Barcelona, Londër, Çikago, Miami dhe Nju Jork.
“Perandoria e tij e modës Inditex është në ngjitje. Aksionet e saj janë rritur me 39% në 12 muajt e fundit, të nxitura nga shitjet e forta; të ardhurat në vitin deri në 31 janar 2023 u rritën me 18% në gati 35 miliardë dollarë”, thekson publikimi.
Ortega bashkëthemeloi “Inditex”, e njohur për zinxhirin e saj të modës “Zara”, me ish-gruan e tij Rosalía Mera, në vitin 1975.
a.k. / dita
