Qeveria britanike ka miratuar ndërtimin e një ambasade të re gjigante të Kinës pranë Kullës së Londrës, pasi shërbimet e inteligjencës i kanë garantuar autoriteteve se rreziqet për sigurinë kombëtare mund të menaxhohen.
Vendimi është marrë nga sekretari për komunitetet, Steve Reed, dhe hap rrugën për një vizitë të kryeministrit Keir Starmer në Pekin në javët në vijim.
Sipas Reed, shqetësimet më të gjera politike apo etike lidhur me Kinën nuk mund të merren parasysh në procesin e planifikimit urban, raporton The Guardian.
Vendimi ka shkaktuar kundërshtime të forta politike. Deputetë nga të gjitha krahët politike kanë shprehur shqetësime, veçanërisht për shkak të afërsisë me kabllot e të dhënave që lidhin City of London.
Megjithatë, MI5, MI6, Ministria e Brendshme dhe Ministria e Jashtme nuk kanë identifikuar rreziqe specifike që do të justifikonin bllokimin e projektit.
Në një letër të përbashkët, drejtori i MI5, Ken McCallum, dhe shefja e GCHQ, Anne Keast-Butler, kanë pranuar se “nuk është realiste të eliminohet çdo rrezik potencial”, por kanë theksuar se është përgatitur një paketë masash sigurie “profesionale dhe proporcionale”.
Megjithatë, Komiteti parlamentar për Inteligjencën dhe Sigurinë ka kritikuar procesin.
Kryetari i tij, Lord Beamish, ka deklaruar se raportet ishin të pjesshme dhe jo të koordinuara siç duhet për një çështje kaq sensitive, duke paralajmëruar se do t’i drejtohen kryeministrit për sqarime.
Ambasada e re pritet të jetë më e madhja në Europë, me mbi 200 punonjës.
Kritikët paralajmërojnë se ajo mund të shndërrohet në qendër spiunazhi dhe presioni ndaj disidentëve kinezë, përfshirë aktivistë nga Hong Kongu. Opozita konservatore e ka quajtur vendimin “dorëzim të turpshëm”, ndërsa ish-lideri Iain Duncan Smith, e ka cilësuar atë si një injorim të shkeljeve të të drejtave të njeriut nga Partia Komuniste Kineze.
Nga ana tjetër, Reed ka theksuar se Kina ka rënë dakord të mbyllë shtatë seli diplomatike ekzistuese dhe t’i përqendrojë ato në një vend të vetëm, gjë që sipas MI5 do ta bëjë më të lehtë monitorimin. Çdo aktivitet i paligjshëm, ka shtuar ai, do të trajtohet përmes mekanizmave ligjorë dhe jo përmes sistemit të planifikimit.
Banorët lokalë kanë paralajmëruar se do të kërkojnë rishikim gjyqësor të vendimit, nëse arrijnë të mbledhin fondet e nevojshme për përfaqësim ligjor.
Vendimi pritet të lehtësojë marrëdhëniet Londër–Pekin përpara vizitës së Starmer në Kinë, në fund të janarit.
Çështja e ambasadës ka qenë prioritet për Pekinin dhe është ngritur drejtpërdrejt nga presidenti Xi Jinping në bisedën e tij të parë telefonike me kryeministrin britanik në gusht 2024.
j.l./ dita
