Kryetari i Komisionit të Zgjedhjeve Ilirian Celibashi shpjegoi detyrimet ligjore që Partia Demokratike ka për tu regjistruar në zgjedhjet e 14 majit.
Sipas Celibashit, Lulzim Basha, si drejtues ligjor i PD-së dhe posedues i të drejtës së vulës dhe firmës, duhet të dorëzojë patjetër dokumentet e firmosura.
“Është e paevitueshme, duhet të firmoset ndryshe nuk regjistrohet. Ky është një problem për partitë politike, nëse ata nuk e zgjidhin me njëri-tjetrin, çfarë problemi ka KQZ këtu”, tha Celibashi.
Kryetari KQZ-së deklaroi se Basha ka 48 orë kohë për të dorëzuar dokumentacionin e nevojshëm të firmosur nga ai për tu bërë pjesë e zgjedhjeve PD-ja.
“Kanë 48 orë kohë për të paraqitur dokumentet. Duke nisur nga sot Basha duhet t’i dorëzojë. Nëse dokumentacioni nuk dorëzohet i plotësuar nuk do të regjistrohet. Deklarata duhet të jetë e firmosur nga drejtuesi i PD-së. Këtë e ka ligji dhe ligji duhet të respektohet”, shtoi më tej ai.
Kreu i KQZ-së iu përgjigj dhe akuzave të dy grupimeve në Partinë Demokratike për vendim të njëanshëm dhe të padrejtë nga Komisioni Qendror i Zgjedhjeve.
“Shoh gjithë këtë diskutim dhe tendencë për të anatemuar nga të gjitha anët e politikës këtë vendimmarrje. Gjithsesi, kjo ka qenë dhe do të jetë kështu. Dokumentacioni i paraqitur nga Partia Demokratike, shoqëruar kërkesën për t’u regjistruar bie në kundërshtim me kodin zgjedhor.
Kodi zgjedhor ka përcaktuar qartë se kërkesa për regjistrim duhet të shoqërohet me një deklaratë të nënshkruar nga kryetari i partisë. Është një dokument ekskluziv, përgjegjësi e kryetarit të partisë. Nëse s’do të ishte kështu, edhe formulimi do të ishte ndryshe, nuk do të theksohej se deklarata duhet të jetë e nënshkruar nga kryetari”, tha Celibashi.
m.b./dita
