Kryekomisioneri Ilirjan Celibashi theksoi gjatë një interviste televizive se të drejtën për të paraqitur kërkesa në KQZ, ligjërisht e ka zoti Lulzim Basha.
Celibashi tha se ka vetëm një Parti Demokratike dhe përpara KQZ-së, të drejtën për të paraqitur kërkesa, përfshirë dhe kërkesën për t’u regjistruar si subjekt zgjedhor e ka zoti Lulzim Basha.
“Kjo bazohet në dokumente, i vetmi dokument është ai i lëshuar nga Regjistri i Partive Politike, tej këtij dokumenti çdo shprehje tjetër e ligjërimeve nuk është e ligjshme, duhet gjithmonë aspekti dokumentar i faktit.
Pala e interesuar në procesin e regjistrimit e përfaqësuar nga zoti Indrit Sefa, ka paraqitur vërtetimin e Gjykatës së Tiranës ku kryetar i PD është Basha dhe ka një autorizim nga Basha, për të kryer veprimet e nevojshme”, tha Celibashi.
Sipas tij, një parti politike mund të vlerësojë që të udhëhiqet nga nënkryetari.
Por për Celibashin kjo duhet bërë me një proces në gjykatë për t’i dhënë nënkryetarit legjitimitetin e plotë që të veprojë si kryetar. Kreu i KQZ tha se kjo procedurë duhet që të ishte rregulluar me kohë nga ana e PD, por ata nuk kanë bërë deri më sot asnjë hap të tillë.
m.b./dita
