I dërguari i Shteteve të Bashkuara për Ballkanin Perëndimor, Gabriel Escobar ka komentuar për herë të parë çështjen McGonigal, ku ka deklaruar se marrëdhëniet Shqipëri-SHBA nuk janë cenuar aspak.
Në një kohë kur opozita e Sali Berishës pretendon ka pasur një krisje të raporteve mes 2 vendeve e me këtë justifikim ka thirrur edhe protestë, zyrtari i lartë i SHBA konfirmon se një gjë e tillë nuk është aspak e vërtetë.
Ky është reagimi i parë nga një zyrtar i lartë amerikanë për çështjen McGonigal, ku tha se kjo çështje i takon FBI.
“Shqipëria është aleate e NATO-s dhe pjesë e Këshillit të Sigurimit, çështja MC Gonigal, nuk e ka dëmtuar aspak marrëdhënien tonë të mirë me Shqipërinë. Shqipëria na ka ndihmuar shumë përgjatë Këshillit të sigurimit. Megjithatë nuk dua të komentoj shumë McGonigal pasi është çështje që i takon FBI. DASH nuk është pjesë e atyre hetimeve”, tha Escobar, në një bashkëbisedim virtual me gazetarë.
Për këtë çështje, opozita, kësaj here e bashkuar, ka thirrur në një mocion me debat pa limit kryeministrin Edi Rama. Në vazhdën e akuzave, Sali Berisha e ka përfshirë në skandal edhe vetë Escobar dhe ambasadoren amerikane, Yuri Kim. Nga ana tjetër, Kryeministri Edi Rama ka mohuar të gjitha akuzat që kanë ardhur në drejtim të tij, duke thënë se janë të pabazuara në fakte.
Kjo çështje erdhi pas arrestimit të ish zyrtarit të lartë të FBI-së, Charles McGonigal, ndaj të cilit rëndonin 2 akuza, një në Nju Jork dhe një në Uashington D.C., ku në rastin e parë akuzohet se ka ndihmuar Oleg Deripaska, një oligark rus nën sanksione, me qëllim që të hiqet nga lista e biznesmenëve të sanksionuar nga qeveria e Shteteve të Bashkuara. Akuzat tjetër lidhet me 2 shqiptarë, Dorian Duçka dhe Agron Neza. Vetë Rama përmendej në aktakuzën amerikane që ka kryer takime me ish zyrtarin e lartë të FBI-së.
o.j/dita
