Dy ja javë pas ‘tërmetit’ me rastin e bujshëm “Negreira” në Spanjë, për dyshimet e ryshfeteve në favor të Barcelonës, ka ardhur reagimi dhe shpërthimi i presidentit të klubit, Joan Laporta. Teksa merrte pjesë në një event të “Auditori 1899”, me kapitenët e ekipeve ndër vite të klubit, ish-deputeti i parlamentit dhe juristi nuk i kurseu sulmet për askënd.
Lajmet e fundit e vënë klubin në rrezik heqje pikësh, mospjesëmarrje në sezonin e ardhshëm të Champions apo edhe dënimin me rënie nga kategoria. “Mos mendoni se prekem për shkak të kësaj dobësie, por sepse kam dëshirë të përballem me të gjithë ata të paturpët që po sulmojnë fanelën tonë. Askush të mos mendojë apo të na e marrë për dobësi”, u shpreh Laporta. Pak ditë më parë ai dha një deklaratë të shkurtët në lidhje me lajmet që publikoheshin, duke thënë se “nuk më surprizoi asgjë”. I u dha garanci tifozëve dhe kërkoi që të ruanin qetësinë përballë kësaj situate dhe për më tepër pas deklaratës së klubit të Real Madrid, që u shpreh i indinjuar me dosjen “Negreira”, që po hetohet nga Prokuroria. “Shikoni, nderi dhe shpirti barcelonist (cule quhen tifozët e skuadrës), as nuk mund të blihet dhe as nuk mund të shitet apo shkelet me këmbë. Të bashkohemi përballë këtyre sulmeve, sepse asgjë që thuhet nuk është e vërtetë”, shkruante avokati që kryeson klubin për herë të dytë, në rrjetet sociale. Dhe në fund siguroi se “do e mbrojmë nderin e klubit, me të gjithë forcën tonë”.
Prokuroria po heton ish-zv/presidentin e Federatës së Arbitrave, Negreira, aktualisht i sëmurë, se vite më parë ka marrë pagesa nga ish-presidenti i klubit Bartomeu, që të jepte informacione se çfarë diskutohej e vendosej në Komisionin e Arbitrave. Ka dyshime se pagesat janë dhënë edhe për të ndërhyrë tek gjyqtarë të caktuar për favorizime, por klubi e ka hedhur poshtë.
