Prej javësh dosja “Negreira” ka trazuar keq ujërat sportivë në Spanjë dhe veçanërisht futbollin, duke vënë nën dyshim të gjithë sistemin, nën dyshimin e korrupsionit nga fundi dhe deri në krye. Megjithëse i ka rënë për pjesë Barcelonës, duket se edhe klube të tjera të fuqishme, si Real Madridi, kanë vepruar njëlloj dhe po i tremben efektit ‘domino’ që mund të hapet nëse katalanasit do bëhen shembull.
UEFA njoftoi dje se ka nisur një hetim për Barcelonën, për shkak të pagesave të klubit spanjoll ndaj një kompanie që drejtohej nga ish-shefi i arbitrave në Spanjë, Enriquez Negreira. Tanimë edhe zyrtarisht Barça rrezikon mos pjesëmarrjen në Champions League sezonin që vjen. “Në përputhje me nenin 31.4. Inspektorët e Etikës dhe Disiplinës të UEFA-s do të kryejnë një hetim për një shkelje të mundshme të kuadrit ligjor të UEFA-s”, shkruhet në njoftimin zyrtar. Duke marrë parasysh edhe raportet e këqija diplomatike mes klubit dhe qeverisë së futbollit europian prej shumë vitesh, ky ndëshkim mund të konsiderohet i sigurt.
Organizata evropiane e futbollit kërkoi të enjten një hetim për këtë çështje, e cila tashmë po ndiqet nga prokurorët në Spanjë. Rregulloret e Ligës së Kampionëve në fuqi që nga prilli 2007 lejojnë UEFA-n të ndalojë skuadrat nga garat për një sezon, nëse ato janë të përfshira në ‘caktimin’ e ndeshjeve. UEFA tha të enjten se u kërkoi inspektorëve disiplinorë që të “kryejnë një hetim në lidhje me një shkelje të mundshme të kuadrit ligjor të UEFA-s nga FC Barcelona në lidhje me të ashtuquajturin “Çështja Negreira”. Dokumentet e gjykatës tregojnë se Barcelona ka paguar 7.3 milionë euro (7.7 milionë dollarë) nga 2001-2018 për kompaninë e José María Enríquez Negreira, ish-zëvendës presidenti i komitetit të arbitrave të futbollit spanjoll.
Barcelona ka mohuar vazhdimisht çdo konflikt interesi, duke thënë se ka paguar për raportet teknike për gjyqtarët, por kurrë nuk është përpjekur të ndikojë në vendimet e tyre në ndeshje.
