Katër janë gjuhët e huaja që do të jepen në provimet kombëtare të arsimit bazë në përfundim të këtij viti shkollor. Në udhëzimin e miratuara nga Ministria e Arsimit dhe Sportit mbi organizimin e provimeve kombëtare të klasave të 9-ta, për gjuhën e huaj, përcaktohet se nxënësit do të testohen në: “anglisht, italisht, frëngjisht dhe gjermanisht”.
Testi i gjuhës së huaj të parë hartohet në përputhje me gjuhën që në planin mësimor të arsimit të mesëm të ulët trajtohet si gjuhë e huaj e detyruar, e cila do të jetë në nivelin gjuhësor A2. Për nxënësit e klasave të nënta të shkollave mbështetëse dygjuhëshe franceze, italiane dhe gjermane, saktësohet se do të japin provim gjuhën përkatëse të seksionit që kanë ndjekur, e cila gjithashtu do të jetë në nivelin gjuhësor A2.
Për vitin shkollor 2022-2023 provimet e lirimit do të zhvillohen në datat 20-26 qershor. Provimi i parë do të zhvillohet në lëndën e gjuhës shqipe në datën 20 qershor, për të vijuar më pas në datën 23 qershor me provimin e matematikës, si dhe në datën 26 qershor provimi i gjuhës së huaj.
Çdo provim kombëtar i arsimit bazë për këtë vit shkollor do të fillojë në orën 10:00, ndërkohë që nxënësit do të kenë në dispozicion 2 orë e 30 minuta për të plotësuar të gjitha pyetjet e testit të secilës lëndë. Për secilën lëndë, pyetjet ose kërkesat në test do të jenë të tri niveleve, nivelit të ulët, atij mesatar, si dhe pyetjet për nxënësit e shkëlqyer.
Nxënësit me aftësi të kufizuara që ndjekin shkollat e zakonshme do t’i zhvillojnë provimet kombëtare bazuar në planin edukativ individual me të cilin punojnë në përshtatje me veçoritë e tyre. Ndërsa drejtoria e Institutit të Nxënësve që nuk shikojnë “Ramazan Kabashi”, do të tërheqë testin në qendrën e Shërbimeve Arsimore një ditë para zhvillimit të provimit, të cilin duhet ta kthejë në sistemin e shkrimit “Brail” që është i përshtatshëm për t’u plotësuar nga nxënësit që kanë këtë aftësi të kufizuar.
p.k/dita
