Mbyllen takimet e para çerekfinale të Conference League, Fiorentina ka hedhur një hap të sigurt drejt kualifikimit, pasi mundi në transfertë polakët e Lech Poznan në shifrat 1-4. Italianët kaluan që në të katërtën minutë në avantazh me anë të Arthur Cabral, po pa u mbushur 20 minuta lojë Velde barazoi rezultatin. Megjithatë, skuadra nga Firence ia doli që të shënonte para se të mbyllej pjesa e parë, me anë të Nicolas Gonzalez. Ndërkohë që në pjesën e dytë Bonaventura dhe Ikone i bënë gjërat e thjeshta, duke i dhënë një fitore të thellë Fiorentinës, që tani është me një këmbë në raundin tjetër.
Një fitore të rëndësishme ka arritur dhe Anderlecht që mundi 2-0 në shtëpi AZ. Belgët shënuan në pjesën e parë me anë Murillo, ndërsa në të dytën ganezi Ashimeru dyfishoi rezultatin, duke i kthyer në favorit për kualifikim, edhe pse në Holandë muzika do të ndryshojë.
Pa fitues përfundoi ndeshja mes Baselit dhe Nice. Zviceranët kaluan në avantazh me anë të Amdouni, por nigeriani Moffi shënoi dy herë pa u mbyllur pjesa e parë, për t’i dhënë avantazhin skuadrës franceze. Në pjesën e dytë Amdouni shënoi sërish, këtë herë me kokë, duke barazuar shifrat që deri në fund nuk ndryshuan më, me kualifikimin që do të vendoset pas 1 jave në Francë.
Kurse belgët e Anderleht, pavarësisht formës së keqe në kampionat, arritën një fitore me peshë ndaj Alkmar 2-0 dhe kanë një këmbë në gjysmëfinale.
