Vazhdojnë të kryhen studime për të mësuar se sa zgjat imuniteti ndaj Covid-19 nga infeksioni natyror dhe ai i fituar nga vaksinimi. Specialistët e Institutit të Shëndetit Publik bëjnë me dije se studimet e kryera deri tani tregojnë se, imuniteti që fitohet pasi keni kaluar Covid-19 mund të jetë i fortë.
Megjithatë, lloji i imunitetit që zhvillohet pas infeksionit ndryshon nga personi në person, duke e bërë atë më pak të parashikueshëm sesa imuniteti pas vaksinimit. Studiuesit po punojnë shumë për ta kuptuar më mirë këtë.
“Ajo që dimë është se, Covid-19 është një sëmundje kërcënuese për jetën që mund të ketë pasoja afatgjata. Ne gjithashtu e dimë se vaksinat e autorizuara nga Organizata Botërore Shëndetësore ndaj Covid-19, u janë dhënë në mënyrë të sigurt miliarda njerëzve. Është shumë më e sigurt të vaksinohesh sesa të rrezikosh të marrësh Covid-19. Vaksinohuni sa më shpejt që të jetë radha juaj, dhe vazhdoni të bëni gjithçka që mundeni për të mbrojtur veten dhe të tjerët. Ndërsa mësojmë më shumë për Covid-19 dhe imunitetin, Organizata Botërore e Shëndetësisë vazhdon të përditësojë udhëzimet dhe rekomandimet”, bëjnë me dije autoritetet e Institutit të Shëndetit Publik.
Aktualisht po vijon vaksinimi në të gjitha pikat vaksinimit antiCovid në vendin tonë. Sipas të dhënave të bëra publike nga Ministria e Shëndetësisë, deri më tani në total janë kryer 3,057,415 vaksinime antiCovid. Numri i vaksinimeve të raportuara, përfshin edhe vaksinimet e qytetarëve shqiptarë të kryera jashtë vendit dhe që janë të regjistruara në sistemet tona të integruara, për t’u dhënë të gjithëve mundësinë për të përmbushur procesin e vaksinimit në Shqipëri ose jashtë vendit.
p.k
