Këto janë pamjet kur makina tip BMW X6 që do përdorej në atentatin e parandaluar në Elbasan, u vodh në qytetin e Shkodrës. Ngjarja është regjistruar më 6 shkurt të këtij viti.
Në videon duket personi që kryen vjedhjen e BMW-së. Ai sillet në vendngjarje nga një makinë Volkswagen e bardhë, e cila ndalet paralel me automjetin mjetin luksoz.
E hap atë me anë të një pulti dhe futet brenda. Mban në kokë një kapuç dhe në fytyrë një maskë për të mos u identifikuar.
I duhen vetëm 20 sekonda që ta marrë makinën dhe largohet nga vendngjarja. Së bashku me të ikën dhe makina tip Volkswagen.
Kjo BMW konsiderohet me tepër rëndësi për hetimin, pasi policia po verifikon se kush e kreu vjedhjen e saj e më pas personin që e bleu.
Në brendësi të këtij automjeti policia gjeti mëngjesin e së dielës 3 armë zjarri kallashnikov e disa bidona benzinë që dyshohet se do përdoreshin për realizimin e një atentati ndaj një personazhi të njohur të botës së krimit në Elbasan.
Për ngjarjen deri tani në pranga kanë rënë Arben Spahiu dhe Arsen Preçi, të cilët kanë refuzuar të flasin. Të dy rezultojnë lidhje familjare dhe shoqërore e Erjon Alibejt, i vënë nën akuzë nga SPAK si porositës i vrasjes së Emiljano Ramazanit dhe Regis Runajt në 2020.
o.j/dita
