Aurelio De Laurentiis kritikon UEFA-n dhe komenton me humor mundësinë e rinovimit me Kvicha Kvaratskhelia. Napoli pret Milanin të dielën në “Diego Maradona”, sfidë për llogari të Serie A. Më pas dy përballjet çerekfinale të Champions League (12 dhe 18 prill).
“Këto janë fatkeqësisht problemet e një UEFA pa kokë… Imagjinoni sikur të përballeshim me Milanin edhe në Kupën e Italisë, do të ishte qesharake. Ashtu siç është qesharake të luash 3 herë ndaj së njëjtës skuadër”, deklaroi presidenti i Napolit. “Milani duhet të kishte luajtur kundër një ekipi tjetër europian dhe Napoli duhet të kishte luajtur kundër një skuadre tjetër europiane. Fatkeqësisht, derisa të ndryshojmë UEFA-n, ne të gjithë do të jemi skllevër të një Ministrie futbolli”. Më pas një batutë në lidhje me yllin gjeorgjian, autor i 14 golave dhe 16 asisteve mes kampionatit dhe Champions në sezonin e tij të parë me Napolin.“Rinovim me Kvaratskhelia? Po çfarë rinovimi thoni? Ai ka edhe 5 vite kontratë me Napolin… Shtim page? Jeni njësoj si gazetarët e tjerë që nuk e kanë mendjen në punët e tyre dhe që në vend që të flasin për gjëra spektakolare bien gjithmonë në këtë vulgaritet parash“, deklaroi kreu i kampionëve të ardhshëm të Italisë.
