Deputeti Ilir Metaj ka komentuar bisedimet dhe marrëveshjen për rikthimin e normalitetit në parlament.
“Sic dihet tashmë, situata e jetës parlamentare nuk është normale prej disa kohësh. Parlamenti po shkon tek publiku jo përmes arsyetimeve apo debateve mbi vendimet dhe efektin e tyre në jetën e vendit, por përmes skupeve të natyrës sa shtyu e kë shtyu, cili e ndezi tymuesin,apo cila e kishte zhurmuesin në çantë.
Ne si maxhorancë, shkojmë në parlament me përgjegjësinë e propozimit të ligjeve që përmirësojnë jetën e qytetarëve, që rritin mirëqënien ekonomike e sociale, që garantojnë barazi e drejtësi dhe që hedhin hapa të sigurtë drejt integrimit europian.
Ndërsa opozita, në vend të ishte aty, si një kor harmonik që jep alternativat e saj për ligjet e propozuar, është në fakt një grumbullim grupesh instrumentistësh që luajnë partitura të ndryshme, me instrumente dhe tonalitete të ndryshme, madje ka mes tyre edhe nga ata që nuk kanë partitura fare dhe instrumentat e vetëm, kanë bilbilat apo zhurmuesit.
Ata kanë zgjedhur të kërkojnë racionalen nëpër labirinthet e absurdit, apo të mishërojnë Sizifin duke zgjedhur të vetëdënohen e të rrotullojnë drejt majës së malit, gurin e rëndë të fatit personal të Sali Berishës dhe familjes së tij”, tha Metaj i ftuar te A2Cnn me gazetaren Denisa Pasholli.
I pyetur pse u ulën për bisedime me non gratën, Metaj u përgjigj: “Gazmend Bardhi nuk është “person non grata”, të paktën jo për momentin.
Në respekt të parlamentarizmit dhe të kryerjes së reformave aq të nevojshme për shqiptarët, ne kemi qenë dhe jemi gjithmonë të gatshëm të japim çdo hapësirë që është në dorën tonë, gjithmonë brenda kornizës ligjore e kushtetuese, për të rikthyer normalitetin e jetës parlamentare.
Në këtë aspekt ne patjetër që bisedojmë me përfaqësuesit e opozitës në parlament, sepse opozitën nuk e zgjedhim ne. Ne respektojmë zgjedhjen a asaj pjese, qoftë edhe të vogël të shqiptarëve që i kanë votuar.
Dhe sigurisht kemi detyrimin ndaj standardeve europiane, që të kemi një jetë parlamentare normale, sikurse kemi edhe detyrimin jo vetëm ndaj aleatëve tanë strategjikë, por edhe ndaj shqiptarëve, që personat “non grata”,ti lëmë të izoluar në llogaritë e tyre me drejtësinë.”
b.m/dita
