Kryekomisioneri i KQZ-së, Ilirjan Celibashi në një konferencë për mediat, është pyetur në lidhje me deklaratën e kryeministrit Rama, i cili tha dje se gjithçka shkoi mirë në këto zgjedhje, përveç dështimit spektakolar të KQZ.
Kryekomisioneri i KQZ-së, Celibashi ka thënë se nuk ka asnjë koment lidhur me këtë deklaratë të kryeministrit Rama.
Gjatë fjalës së tij, Celibashi ka deklaruar se pajisjet e identifikimit biometrik të votuesve nuk kanë funksionuar në 10% të qendrave të votimit, teksa ka shtuar se në 5% të qendrave të votimit, procesi i votimit nuk ka nisur në 07:00, por midis orës 08:00-09:30.
Kryekomisioneri Celibashi iu ka kërkuar ndjesë atyre votuese që mund të kenë dashur të votojnë më herët, por si pasojë e mosfunksionimit të pajisjeve, iu është dashur të presin apo të largohen pa votuar nga qendrat e votimit.
Pyetje: Kryeministri tha se gjithçka shkoi mirë, përveç menaxhimit skandaloz të KQZ-së. Keni ndonjë koment?
Ilirjan Celibashi: Nuk kam asnjë koment për këtë deklaratë të kryeministrit.
Pyetje: Thatë që nuk donit që ta komentonit, por ai tha gjithashtu që e gjithë mangësia që ndodhi me KQZ-në, nuk do ta lëmë me kaq?
Ilirjan Celibashi: Nuk kam asnjë koment lidhur me këtë deklaratë. Jemi në proces të mbledhjes të gjithë informacionit, por do të doja të risillja në vëmendje faktin se po flasim për vetëm 10 për qind të qendrave të votimit që nuk ka funksionuar pajisja elektronike e identifikimit. Ka mundësi që edhe në një pjesë të madhe të këtyre që pajisja të ketë funksionuar, por nuk kemi pasur informacion. Në momentin që do t’i kemi në KQZ, do të kuptojmë nëse kanë funksionuar apo jo. Jemi në proces të verifikimit të kësaj situate. Jemi duke diskutuar për këto numra dhe për këto shifra që gjithësecili prej nesh bën interpretimin e vet. Ka pasur një fillim me vonesë në këto qendra votimi, kryesisht kanë qenë në Tiranë, vizibiliteti ka qenë edhe më i madh. Në 90 për qind të qendrave të votimit është hapur në 7:30. Për 5 % procesi ka filluar midis orës 08:00 dhe 09:30. Janë vetëm 5% e qendrave të votimit, në të cilat procesi i votimi ka filluar pas orës 08 deri në 09:30. Këto janë fakte dhe mbi këto fakte secili prej nesh mund të bëjë vlerësimin e vet. Ne kemi thënë që edhe sikur dhe njëri të tjetë ne i prezantojmë të gjithë ndjesën tonë. Ne do t’i kërkojmë ndjesë qoftë edhe njërit prej votuesve që kanë dashur që të votojnë që në orën 07:00.
o.j/dita
