Një oficer policie i cili u filmua teksa dhunonte një kamerier në një hotel të njohur në qytetin e Vlorës, është pezulluar nga detyra.
“Ndërkohë, Drejtoria e Standardeve Profesionale në Policinë e Shtetit ka nisur ndaj Nënkomisar A. I., me detyrë Oficer Policie në Komisariatin e Policisë Kufitare Dibër, procedurën disiplinore të rëndë, bazuar në Ligjin nr. 82/2024 “Për Policinë e Shtetit”, që parashikon masa për: raste të sjelljeve që diskreditojnë imazhin dhe dëmtojnë besimin e publikut tek Policia e Shtetit, të kryera jashtë ushtrimit të detyrës; kryerjen e veprimeve që cenojnë rëndë figurën e punonjësit të policisë, institucionit apo shërbimit policor në tërësi.
Nga veprimet e para hetimore ka rezultuar se Nënkomisar A. I., jashtë shërbimit dhe në shoqërinë e shtetasit L. B., 57 vjeç, banues në lagjen “Pavarësia”, Vlorë, është konfliktuar fillimisht fizikisht me shtetasin A. B., 18 vjeç. Pas përshkallëzimit të konfliktit, janë përfshirë edhe shtetasit V. B., 53 vjeç, pronar i një hoteli në lagjen “Pavarësia 2”, dhe E. M. Aktualisht, Nënkomisar A. I. ndodhet i shtruar në Spitalin Rajonal Vlorë”, bëri me dije policia.
Bëhet fjalë për ngjarjen e rëndë të ndodhur mbrëmjen e djeshme në Vlorë, ku një i mitur që punonte si kamarier në një hotel të njohur në këtë qytet është dhunuar nga oficeri i policisë për një ngatërresë me porosinë.
