Gazment Bardhi komentoi në “Now me Erla Mëhillin” deklaratat e tij për Sali Berishën kur e ka quajtur “vrasës”. Në debatin në Euronews Albania, atij iu vu në dukje se është e pamoralshme të ulesh në një tryezë me dikë që më herët e ke akuzuar kaq rëndë.
Bardhi argumentoi se nuk mund të vendosë inatet personale mbi interesat e opozitës.
Sipas tij, çfarë është absurde është sherri brenda PD-së dhe nuk mund të vijojë më tepër në kurriz të qytetarëve.
Sipas Bardhit është më e ndershme të bashkëpunojë me Berishën se të vijojë problemin e brendshëm në PD dhe të mos kryejë funksionin e tij për të cilin paguhet nga taksat e qytetarëve.
“Ajo që unë kam bërë sot është nevoja urgjente që ka Shqipëria për një opozitë funksionale dhe të unifikuar. Nuk i zgjedh unë faktorët opozitar në vend, unë kam për detyrë të jap modelin tim, aktet e mia, sjelljen time. E rëndësishme në këtë moment është do rrimë peng i sherrit brenda Partisë Demokratike apo të bëjmë opozitë me Edi Ramën. Qytetarët nga taksat e tyre mua si deputet i Kuvendit të Shqipërisë më paguajnë të bëj opozitë apo të sherrosem me Sali Berishën. Mos i nxirrni fjalët nga konteksti dhe nga momenti ku janë thënë. Unë nuk kam hyrë në politikë për të nxjerrë inatet e mia. E kam thënë me dhjetëra herë secili nga ne do të duhet të kapërcejë veten për opozitën funksionale.
Ti po më thua mua, meqenëse jeni sharë me Sali Berishën vazhdojeni sherrin dhe nja dy vite të tjera. Secili me moralin e tij personal iu prezantohet qytetarëve. Unë nuk jam Sali Berisha dhe Sali Berisha nuk është Gazment Bardhi. Unë mbaj përgjegjësi vetëm për aktet dhe veprimet e mia. Fakti që unë i kam bërë akuza po themi Ermonela Feljat, çfarë do të thotë që nuk do të shkoj në një konferencë kryetarësh meqë përballë kam atë?! S’mund të mbajmë inat me njëri tjetrin dhe të vuajnë pasojat qytetarët”, u shpreh Bardhi.
Siç sqaroi ai, për aq kohë sa nuk ka shkelur asnjë nga parimet që ndërkombëtarët duan të shohin te opozita shqiptare atëherë nuk ka arsye pse t’i druhet një paralajmërimi.
“Cilido që i fryn tezës që partnerët ndërkombëtarë kanë marrë vendime lidhur me PD-në apo opozitën sepse duan të shuajë PD-në dhe opozitën, në fakt është duke kontribuar për ngritjen e një fryme kundër Shteteve të Bashkuara të Amerikës.
Nuk kam bërë takime me ndërkombëtarët. Kam pasur takim me 59 deputetë të Partisë Demokratike, jo vetëm me zotin Berisha.
Takimi me zotin Berisha ka ndodhur të martën, sot jemi e enjte. S’kam pasur mundësi të kem takime. Më parë jam takuar me ndërkombëtarët dhe kam folur për nevojën që ka opozita për t’u forcuar dhe se në këtë moment ku ndodhet Shqipëria, vijimi i një konflikti brenda opozitës po shuan Partinë Demokratike dhe opozitën dhe po fuqizon në mënyrë të pamerituar Edi Ramën”, u shpreh Bardhi.
j.l./ dita
